Në dorë të politikës, me dëshirë

9 Korrik 2014, 21:19, Opinione CNA

Nga Mero Baze

Këshilli i Lartë i Drejtësisë ka dorëzuar me dëshirë dhe vetëdije në dorë të politikës fatin e tij. Ndërsa kritikat kishin nisur lidhur me votimet kompakte politike, në së paku 8 vota të identifkuara si kamikazë të Berishës, pak nga pak situata evoluoi dhe ata u kthyen në aktorë të betejës poltike.

Së pari, KLD nuk ka dhënë asnjë shenjë gjykimi profesional në raport me propozimet e qeverisë. Përkundër kësaj, ajo është blinduar si një çerdhe nepotizmi e gjyqtarëve, që kanë punësuar aty kunetër, baxhanakë dhe kushërinj dhe veprojnë si një sekt familjaro- politik. KLD ka hedhur poshtë të gjitha propozimet që rrezatojnë vullnetin politik të qeverisë dhe nuk ka lënë shans për asnjë këndvështrim gri për angazhimin politik të saj.

Së dyti, KLD u vu në provë për të testuar vullnetin e saj në luftën ndaj korrupsionit në drejtësi. Rasti i gjyqtarit Gjin Gjoni, kallëzuar nga ILDKP, si dhe disa gjyqtarëve të tjerë në rrethe, ishin raste flagrante, ku e ke shumë të vështirë t?i mbrosh. KLD jo vetëm që i mbrojti poltikisht akuzat për korrupsion, por sulmoi qeverinë për vullnetin e saj politik të shprehur në kërkesat për penalizim gjyqtarësh. KLD e ktheu mbrojtjen e Gjin Gjonit në një kazus politik, duke e ngritur stekën e lejimit të korrupsionit në nivele të frikshme.

Së fundmi, sot KLD hoqi të gjithë skrupujt dhe kërkoi në krah të saj Partinë Demokratike dhe ministrin e Berishës, të cilët praktikisht janë tutorët realë të korrupsionit në drejtësi. Eduard Halimi, i cili është një nga njerëzit më të pasur në Shqipëri për shkak të të qenit tutor i këtij sistemi, doli sot hapur si avokat i KLD dhe kateve të saj, duke mos lënë asnjë vend për debat profesional apo faktografik rreth korrupsionit në drejtësi dhe rolit kyç të KLD në këtë korrupsion.

Këshilli i Lartë i Drejtësisë është vetërreshtuar politikisht në këtë debat, si një trup i vetëm me Partinë Demokratike dhe tani nuk ka më kuptim asnjëlloj debati. Meqë debatin duan ta kanalizojnë tek politika, ajo duhet ta zgjidhë.

Dy partitë e mëdha të koalicionit qeveritar janë shprehur qartë se fati i KLD duhet të vendoset në Kuvend, ndërsa PD pretendon se ndryshimi i KLD synon mosdënimin e korrupsionit të ri në radhët e pushtetit.

Në fakt historia e mosndëshkueshmërisë së politikanëve dhe gjyqtarëve është një trashëgimi politike e Sali Berishës dhe radha e ndëshkimit duhet të fillojë me atë. Pastaj me radhë për sekserin e Gërdecit, që hapi 26 varre, për atë që zhduku lekët e Rrugës së Kombit, për ata që pushkatuan katër qytetarë të pafajshëm, për ata që pastruan para me Damir Fazlliçin dhe më tej, nëse kanë ortakë të rinj në këtë pushtet, natyrisht dhe me këta.

Do të ishte më dinjitoze për Shqipërinë që debati për reformën në drejtësi të niste mbi baza profesionale dhe të gjykohej në themel ndryshimi që duhej bërë. Por me sa duket Berisha e ka të qartë se çdo humbje e pozitave të pushtetit mbi këtë sistem, është i pafavorshëm për të dhe kërkon vetëm ta mbrojë politikisht. Kështu në fakt është më e lehtë për qeverinë. Duke zhvendosur betejën në parlament, KLD do ketë rastin të kuptojë se pse nuk duhet të bëhet barrikadë kundër vullnetit të shqiptarëve për drejtësi të pakorruptuar. Ose më thjeshtë, do ta kuptojë se po shkove pas Zenit, në pleh do përfundosh.