web counter
LEXO PA REKLAMA!

SHKARKO APP

App Store
Google Play

E fundit!

x

Tregu i sigurimeve po rritet më ngadalë/ Bonus-malus ka ulur primin mesatar të TPL-ve

26 Qershor 2026, 18:46, Ekonomi CNA

Tregu i sigurimeve po rritet më ngadalë/ Bonus-malus ka ulur primin

Tregu i sigurimeve po rritet me ritme më të ngadalta këtë vit. Sipas të dhënave nga Autoriteti i Mbikëqyrjes Financiare, për 5-mujorin janar-maj primet e shkruara bruto janë rritur me 4.9% krahasuar të njëjtën periudhë të vitit të kaluar.

Rritja paraqitet në nivele të përafërta dhe modeste për të dyja segmentet kryesore. Tregu i produkteve të jo-Jetës është rritur me 4.9%, në mesatare e tregut, ndërsa tregu i Jetës është rritur me 5.5%. Rritjen totale të tregut e ka ndikuar negativisht tkurrja e mëtejshme në veprimtarinë tejet modeste të risigurimit.

AMF-ja vlerëson se ngadalësimi i tregut është ndikuar ndjeshëm nga ulja e primit mesatar në sigurimin e detyrueshëm motorik për përgjegjësitë ndaj palëve të treta (MTPL).

Primi mesatar është ulur me 2.12%, kryesisht për shkak të efekteve të nisjes së zbatimit të sistemit bonus-malus për këtë produkt. Duke qenë se pjesa dërrmuese e drejtuesve të mjeteve kanë përfituar bonus, sado modest, kjo është reflektuar në një ulje të primit mesatar dhe në një rritje më të dobët të tregut të këtij produkti. Sidoqoftë, primet e shkruara bruto të sigurimit TPL ngelen në rritje, me 5.6% krahasuar me një vit më parë.

Dy produktet e tjerë të sigurimeve të detyrueshme motorike (Kartoni Jeshil dhe Kufitare), edhe pse me peshë të moderuar, raportojnë rënie si pasojë e lehtësimit të lëvizjes së autoveturave drejt vendeve kufitare.

Disa prej produkteve të sigurimit vullnetar po shfaqin një ecuri pak më të mirë, por pa ndikuar rrënjësisht në peshën modeste që ato kanë brenda tregut të sigurimeve.

Produkti kryesor i sigurimit vullnetar, sigurimi ndaj zjarrit dhe forcave të natyrës, u rrit me 9.5% krahasuar me një vit më parë. Ecuri pozitive kanë shfaqur edhe sigurimi i aksidenteve në udhëtim, sigurimi i sëmundjeve dhe sigurimi i përgjegjësive civile.

Edhe tregu i sigurimit të Jetës këtë vit po rritet me ritme më të ngadalta. Ngadalësimi është përcaktuar kryesisht nga rënia në disa produkte specifike, si Jeta në Grup apo Flexi Plan. Produkti kryesor i tregut, sigurimi i Jetës së Debitorit, vazhdon të rritet me ritme dyshifrore dhe është gjithnjë e më shumë dominues në strukturën e tregut të Jetës, me 82.5% të primeve të shkruara bruto.

Në krahun e dëmeve, këtë vit rritja paraqitet me ritme ndjeshëm më të larta. Në pesë muaj, tregu i sigurime pagoi dëme për një vlerë totale prej 3.8 miliardë lekësh, në rritje me 15.9% krahasuar me një vit më parë. Dëmet janë rritur me ritme veçanërisht të larta në tregun e Jo-Jetës, me agti 19% më shumë krahasuar me një vit më parë.

Rritja lidhet sidomos me sigurimin e katastrofave, produkt ku dëmet janë rritur me 211% krahasuar me vitin e kaluar dhe që mund të shpjegohet me valën e përmbytjeve që përfshiu disa zona të vendit në muajt e parë të vitit./ Monitor 





Lajmet e fundit nga