Përfundon edhe telenovela “Di Maria”, menaxheri: Po, do të firmosim me Juventusin

Pas shumë peripecish, më në fund horizonti është më i qartë se kurrë dhe Juventusi e mbyll totalisht me Angel Di Marian. Pas kishte gjetur akordin me Pol Pogba, tashmë edhe dëshira e madhe e trajnerit Masimiliano Alegri do të zbarkojë brenda pak ditësh në Torino. Konfirmimi final ka ardhur nga stafi i menaxherëve të 34-vjeçarit, të cilët në një komunikim me të përditshmen torineze “La Stampa” kanë konfirmuar gjithçka: “Po flasim për detajet e fundit me Juventusin dhe besoj se nëse ato plotësohen do të vijë normalisht edhe firma e Angelit në kontratë. Jemi në mbyllje dhe besojmë se do të shkojë gjithçka shumë mirë”. Ato detaje për të cilat stafi i Di Marias flet është çështje e jetëgjatësisë së akordit. Sulmuesi i majtë kërkon vetëm 1 vit kontratë fillimisht, për të mos qenë i kushtëzuar nga një kohëzgjatje me e madhe dhe ka pranuar 7 milionë euro në sezon, ndërkohë që me një akord 2-vjeçar rroga pritej të ishte edhe më e lartë. Në të njëjtën kohë, për të larguar edhe çdo dyshim të fundit lidhur me faktin se Angel Di Maria do të jetë një futbollist i Juventusi është fakti se nga pasditja e djeshme, bashkëshortja e futbollistit, Jorgelina Kardozo, ka nisur që të ndjekë në të gjitha rrjetet sociale prifilin zyrtar të Juventusit.