E fundit!

15:31 Qyteti im

“Atdheu mbi të gjitha”/ Koncerti që bashkoi artistët dhe publikun në Pogradec

Përpara qindra qytetarëve dhe turistëve, në sheshin “Odeon...

Nuk po përshtatet te Liverpool, Chiesa drejt rikthimit në Serie A. Zbulohet klubi

1 Janar 2025, 14:46, Sport CNA

Nuk po përshtatet te Liverpool, Chiesa drejt rikthimit në Serie A.

Federico Chiesa mund të rikthehet në Serinë A dhe Napoli duket në avantazh për të siguruar shërbimet e sulmuesit italian. 27-vjeçari, i cili u transferua te Liverpool gjatë merkatos së verës nga Juventusi për një shifër prej 15 milionë eurosh, nuk po arrin të gjejë formën e tij më të mirë në Premier Ligë. Me vetëm disa muaj në “Anfield”, Chiesa ka hasur vështirësi të mëdha për t’u përshtatur me lojën dhe intensitetin e futbollit anglez, gjë që ka hapur diskutime për një rikthim të mundshëm në Itali.

Kontrata e tij me Liverpool është e vlefshme deri në vitin 2028, por duket se palët janë të hapura për një lëvizje në formën e huazimit. Në këtë situatë, Napoli mund të përfitojë, duke afruar në skuadër një lojtar të klasit të lartë pa investuar shumë. Për skuadrën e trajnerit Antonio Conte, afrimi i Chiesa-s mund të jetë një shtysë e rëndësishme në garën për titullin kampion në Serinë A këtë sezon.

Napoli, që aktualisht po tregon ambicie të mëdha për titullin pas suksesit historik dy sezone më parë, kërkon të përforcojë skuadrën me elementë cilësorë. Trajneri Conte, i njohur për aftësitë e tij për të ndërtuar ekipe fituese, e konsideron sulmuesin një përforcim ideal për repartin e avancuar. Energjia, shpejtësia dhe aftësia për të luajtur në disa pozicione ofensive e bëjnë italianin një lojtar shumë të vlefshëm për formacionin e Napolit.

Për Chiesa-n, një rikthim në Serinë A mund të jetë mundësia ideale për të rigjetur besimin dhe formën e tij më të mirë. Pavarësisht se ai ishte një nga lojtarët më të spikatur te Juventusi, duke dhënë kontribut të rëndësishëm si në kampionat, ashtu edhe në Evropë, kalimi te Liverpool nuk ka rezultuar siç pritej. Rikthimi në një ambient të njohur, ku ai ka shkëlqyer më parë, mund të ndihmojë në rifitimin e vetëbesimit dhe në rikthimin e tij në nivelet më të larta.

Huazimi i mundshëm i Chiesa-s te Napoli duket si një zgjidhje që kënaq të gjitha palët e përfshira. Liverpuli, që duket se nuk ka gjetur ende mënyrën për ta integruar plotësisht italianin në stilin e tyre të lojës, do të mund të ulte presionin mbi lojtarin dhe të evitonte humbjen e vlerës së tij në merkato. Napoli, nga ana tjetër, do të siguronte një lojtar të rëndësishëm pa marrë përsipër një barrë të rëndë financiare, ndërsa Kieza do të kishte mundësinë të rilindte në një ambient ku është i vlerësuar dhe i njohur.