Manaj zgjedh skuadrën e re, Sivasspor ul çmimin

1 Janar 2025, 12:57, Sport CNA

Rey Manaj duket se po bën gjithçka për të siguruar largimin nga Sivasspor. Sulmuesi dëshiron të kalojë te Trabzonspori, një prej klubeve më prestigjioze të futbollit turk. Futbollisti shqiptar, i cili kërkon një kapitull të ri në karrierën e tij, raportohet se ka zhvilluar një takim me drejtuesit e klubit aktual, ku ka shprehur hapur kërkesën për t’u larguar që në merkaton e janarit.

Sipas mediave turke, Manaj ka treguar gatishmërinë për të sakrifikuar disa bonuse të rëndësishme të kontratës së tij aktuale, vetëm që të lehtësojë transferimin drejt Trabzonsporit. Kjo tregon vendosmërinë e tij për të bërë këtë lëvizje, duke u përpjekur të ulë vlerën e kartonit që Sivass ka vendosur mbi të. Në verë, Sivasspor pretendonte shifra të larta për kartonin e tij, që arrinin deri në 10-15 milionë euro, por situata tani ka ndryshuar. Klubi është gati ta lejojë largimin e tij për një shumë ë më të ulët, prej rreth 3 milionë eurosh. Nga ana tjetër, Trabzonspori ka bërë një ofertë fillestare që përfshin 1.3 milionë euro dhe tre lojtarë në formë huazimi, me opsion blerjeje të mëvonshme. Ky propozim duket ende larg kërkesave të Sivassporit, por bisedimet mes palëve mbeten të hapura. Situata komplekse financiare dhe konkurrenca në merkato mund të diktojnë zhvillimet e ardhshme, ndërsa Manaj shpreson që dëshira e tij për të kaluar te Trabzonspori të bëhet realitet.

Ky transferim nuk është thjesht një çështje ekonomike apo sportive, por edhe një hap i rëndësishëm për karrierën e sulmuesit shqiptar, i cili kërkon të luajë në një ekip më konkurrues dhe të ketë mundësi më të mëdha për t’u afirmuar në futbollin turk. Trabzonspori, një klub që ka ambicie të mëdha dhe luan rregullisht në arenën ndërkombëtare, mund të jetë destinacioni i duhur për Manajn, por mbetet për t’u parë nëse drejtuesit e Sivasspor do të pranojnë kushtet e propozuara. Në ditët në vijim, negociatat pritet të intensifikohen, me shpresën që të gjendet një marrëveshje që kënaq të gjitha palët. Ndërkohë, Manaj vazhdon të tregojë seriozitetin dhe vendosmërinë e tij, duke bërë të qartë se prioriteti i tij është të bëjë një hap përpara në karrierë.