E fundit!

13:04 Aktualitet

Rikonstruktimi i Urgjencës në Lushnjë/ Korreshi: Dyshemeja si letër duhani, hekurat si fije shkrepëse

Deputeti i PD-së, Saimir Korreshi, ka denoncuar sërish pro...

Broja tregon përse zgjodhi Everton-in: Dua të bëhem aset i rëndësishëm

31 Dhjetor 2024, 16:09, Sport CNA

Broja tregon përse zgjodhi Everton-in: Dua të bëhem aset i

Sulmuesi shqiptar, Armando Broja, bëri një hap të rëndësishëm në karrierën e tij duke kaluar në huazim tek Everton gjatë merkatos së verës. Në një intervistë të dhënë për mediat britanike, ai ka zbuluar arsyet që e çuan drejt këtij vendimi dhe pritshmëritë për sezonin në vazhdim.

“Kam folur me Evertonin disa herë, jo vetëm këtë verë, por edhe verën e kaluar. E dija që ata më pëlqenin dhe kur më kërkuan në ditën e fundit të merkatos, ishte një vendim i shpejtë, por që ndjeva se duhej ta merrja. Ishte një mundësi për diçka të re, një hap nga Chelsea drejt një sfide të ndryshme”, tha fillimisht sulmuesi.

Për Brojën, ky transferim nuk është vetëm një lëvizje për të siguruar minuta në fushë, por edhe një shans për të treguar aftësitë e tij në një nivel të ri konkurrues. Sulmuesi luajti me Evertonin në një ndeshje të vështirë kundër Manchester Cityt, ku megjithëse skuadra e tij humbi, ai arriti të lërë një përshtypje pozitive me angazhimin dhe energjinë e tij në lojë.

“Gjithmonë dua të tregoj impenjimin tim për ekipin. Qoftë me gola, asistime, mbajtjen e topit lart apo krijimin e rasteve, synimi im është gjithmonë të ndihmoj ekipin të arrijë rezultate.”, u shpreh ai.

Edhe pse Everton nuk arriti të shmangte humbjen ndaj Nottingham, Broja u aktivizua për 75 minuta dhe vazhdon të jetë një element i rëndësishëm për ekipin. “Nuk do ta quaja një nga ndeshjet e mia më të mira, por kam bërë përmirësime. Sigurisht që dua të jap gjithçka dhe të bëj më mirë. Dua të ndihmoj Evertonin të arrijë objektivat e tij këtë sezon dhe të tregoj që mund të jem një aset i rëndësishëm për klubin.”, përfundoi sulmuesi i Shqipërisë.

Ky sezon përfaqëson një mundësi të artë për Brojën, i cili vjen pas një dëmtimi të rëndë që e mbajti larg fushave për një periudhë të gjatë. Huazimi tek Everton është një shans për të rikthyer formën dhe për të treguar potencialin e tij të plotë. Performancat e tij do të jenë thelbësore për vendimin që Everton duhet të marrë në fund të sezonit, nëse do e blejë apo jo kartonin nga Chelsea.

Me një përkushtim të palëkundur dhe dëshirë për të përmirësuar vazhdimisht, Broja mbetet një nga lojtarët më premtues për të ardhmen e futbollit shqiptar dhe më gjerë.