web counter
LEXO PA REKLAMA!

SHKARKO APP

App Store
Google Play

E fundit!

x

“Atdheu mbi të gjitha”/ Koncerti që bashkoi artistët dhe publikun në Pogradec

17 Korrik 2026, 15:31, Qyteti im CNA

“Atdheu mbi të gjitha”/ Koncerti që bashkoi artistët

Përpara qindra qytetarëve dhe turistëve, në sheshin “Odeon” të Pogradecit u zhvillua koncerti “Atdheu mbi të gjitha”, një aktivitet artistik që solli në skenë këngët më të njohura të traditës shqiptare nga të gjitha trevat. Artistë të njohur interpretuan repertorin e tyre në një atmosferë festive, duke përcjellë mesazhe për ruajtjen e identitetit kombëtar, kulturës dhe muzikës shqiptare.

Artisti nga Struga, Selami Kolonja, u shpreh se koncerti në Pogradec ishte një përjetim i veçantë, ndërsa vlerësoi mikpritjen e publikut dhe organizimin e Bashkisë Pogradec. Ai theksoi se pas koncertit të zhvilluar një natë më parë në Strugë, edhe publiku pogradecar e priti me shumë dashuri repertorin që përfshinte këngë nga jugu në veri i Shqipërisë. Sipas tij, muzika shqiptare duhet të vazhdojë të dëgjohet në të gjitha trevat ku jetojnë shqiptarët.

“Atdheu mbi të gjitha”/ Koncerti që bashkoi artistët

"Kënaqësi e jashtëzakonshme që të performosh sonte në një atmosferë kaq të mrekullueshme në Pogradecin e Lasgushit dhe të Mitrush Kutelit, të dy poetëve dhe shkrimtarëve të mëdhenj. Ishte një kënaqësi e jashtëzakonshme dhe e shfrytëzoj momentin dhe rastin që të falënderoj bashkinë për ftesën që na bëri, për mundësinë që na dha për realizimin e këtij koncerti. Ne mbrëmë performuam në Strugë, morëm një dashuri ndryshe, dhe sonte morëm një dashuri ndryshe. Përzgjodhëm një mori këngësh nga jugu në veri dhe u vure re që nga publiku pogradecar dhe gjithë ata mysafirë dhe të ftuar, turistë që ishin, u vure re që ne e morëm atë dashuri dhe dhamë shumë dashuri. Kështu që le të dëgjohet kënga e bukur shqipe në të gjitha sheshet tona, kudo që jetojnë shqiptarët."

“Atdheu mbi të gjitha”/ Koncerti që bashkoi artistët

Tenori Kastriot Tusha tha se koncerti është pjesë e një turi artistik me këngë nga të gjitha krahinat shqiptare, ndërsa finalja me këngën “Nën një flamur të pandarë” mbart një simbolikë të veçantë. Ai vlerësoi publikun pogradecar për respektin ndaj artistëve dhe falënderoi organizatorët për ftesën, duke kujtuar se edhe koncerti i zhvilluar një natë më parë në Strugë ishte pritur me të njëjtin entuziazëm.

"Është vazhdimësi e koncerteve me këtë program të bukur nga Shqipëria. Këngë të veriut, të jugut, të Shqipërisë së Mesme, por edhe fillimi me këngët pothuajse dhe sidomos finalen e kemi me këngën 'Nën një flamur të pandarë'. Është kënaqësi të vish në Pogradec. Ju falënderoj shumë që na bëni pjesë të eventit, të gëzimit veror. Unë shikoj që publiku është i mrekullueshëm si gjithmonë, di t'i presë dhe respektojë artistët. Një falënderim për organizatorët, kryetarin dhe shpresojmë që jemi në vazhdimësi të koncertit që besoj publiku do të mbetet i kënaqur. Mbrëmë ishim në Strugë dhe me një atmosferë festive, kishin ardhur shumë emigrantë si sonte këtu, në sheshin e Strugës, buzë Drinit, me një pritje dhe duartrokitje të mrekullueshme."

Këngëtarja Enkelejda Arifi u shpreh se mbeti e impresionuar nga natyra, mikpritja dhe atmosfera që krijoi publiku në Pogradec. Ajo theksoi se grupi artistik përfaqëson treva të ndryshme shqiptare dhe synon të promovojë kulturën, traditat dhe muzikën popullore në çdo vend ku performon. Pas Pogradecit, artistët do të vijojnë turneun me koncerte në Gjilan dhe më pas në Dibër të Madhe.

“Atdheu mbi të gjitha”/ Koncerti që bashkoi artistët

"Unë u ndjeva shumë këndshëm. E para e punës nga natyra e bukur, nga mikpritja, nga interesi i qytetarëve. Sigurisht, gjatë performancës u duartrokit shumë, por dhe u kërcye shumë dhe njerëzit u kënaqën shumë. Po, domethënë vetë grupi ynë është formuar i tillë. Domethënë ka një përfaqësim gjeografik, historik të mbarë Shqipërisë. Mendoj që përpiqemi të përcjellim muzikën, kulturën dhe traditat e trevave tona kudo që shkojmë. Ndalesa e radhës do të jetë Gjilani në Kosovë, dhe më pas do të jemi në Dibër të Madhe."

Këngëtari Hysni Alushi tha se pjesëmarrja e madhe e të rinjve dhe duartrokitjet e publikut ishin shpërblimi më i bukur për artistët. Ai zbuloi se kishte interpretuar një këngë të orkestruar posaçërisht në stilin pogradecar, si një homazh për qytetin. Në fund, Alushi përcolli një mesazh për ruajtjen e traditës, identitetit kombëtar dhe këngës shqiptare, duke e cilësuar atë një pasuri që duhet trashëguar brez pas brezi.

“Atdheu mbi të gjitha”/ Koncerti që bashkoi artistët

"Edhe pse ndikoi sporti, po unë pashë sonte që kishte plot të rinj edhe një pjesëmarrje të jashtëzakonshme, shumë të bukur, shumë të ngrohtë. Duartrokitjet nuk na munguan, ajo ishte dhurata më e bukur për ne. Po, unë kam orkestruar një këngë në stilin e Pogradecit edhe e kisha kënaqësi ta këndoja sot në Pogradec. Atë e kam bërë enkas për këtë zonë. Jemi në sezon, vijmë nga mbrëmë që ishim në Strugë, edhe atje ishte një koncert madhështor, një ambient shumë shumë i ngrohtë, shumë i bukur dhe i këndshëm. Ishim nga ana tjetër e liqenit edhe erdhëm këtej liqenit në fakt, dy qytetet e mrekullueshme. Të dashur vëllezër dhe motra shqiptare, ju uroj mos ta harrojmë traditën, të ruajmë shqiptarinë tonë, të ruajmë këngët tona të bukura shqiptare. Janë me të vërtetë shumë të bukura."

Koncerti “Atdheu mbi të gjitha” mblodhi në sheshin “Odeon” qytetarë, pushues dhe turistë, të cilët shoqëruan me duartrokitje dhe këngë interpretimet e artistëve. Mbrëmja u kthye në një festë të muzikës shqiptare, duke përcjellë mesazhin e bashkimit përmes artit dhe traditës, në një prej destinacioneve më të frekuentuara të sezonit veror./ CNA





Lajmet e fundit nga