web counter
LEXO PA REKLAMA!

SHKARKO APP

App Store
Google Play

E fundit!

x

Krimbi i rrënjës dëmton misrin në Maliq/ Fermerët kërkojnë ndihmë: Kemi humbur gjithë prodhimin

29 Qershor 2026, 09:21, Qyteti im CNA

Krimbi i rrënjës dëmton misrin në Maliq/ Fermerët

Fermerët e zonës së Drithasit në Maliq po përballen me një tjetër goditje në kulturën e misrit. Pas përmbytjeve të muajve të kaluar, dhjetëra hektarë tokë janë prekur nga një dëmtues i njohur si “krimbi i rrënjës”, duke shkaktuar tharjen e bimëve dhe humbje të prodhimit. Në parcelat e fermerit Petrit Ymeri, dëmi është i dukshëm.

Nga 9 hektarë misër të mbjellë, ai thotë se më shumë se 70% e sipërfaqes është dëmtuar, ndërsa investimi i bërë prej tij rrezikon të humbasë tërësisht.

 

“Këto janë situata që përsëriten ka nja 6-7 vjet. Njëherë nga thatësira, njëherë nga lagështira e tepërt. Këtë vit ka hyrë një krimb, ngaqë u përmbyt toka dhe ka marrë një infeksion të rëndë. Ia ka ngrënë rrënjën misrit dhe tani bie, thahet, nuk nxjerr kallinj. Është i mbaruar i gjithi. Unë kam 9 hektarë. Kostoja shkon rreth 13-14 milionë lekë. Dëmi deri tani llogaritet mbi 70%. Kemi njoftuar edhe strukturat e bujqësisë, erdhën e panë, por nuk ka shumë mundësi për ta luftuar. Kërkojmë ndihmën e shtetit, të na thonë çfarë të përdorim dhe si të veprojmë”, tha fermeri.

 

Ymeri thotë se përmbytjet kanë krijuar kushtet për zhvillimin e infeksioneve në tokë. Për shkak të qëndrimit të gjatë të ujit, sipërfaqet nuk kanë pasur kohën e nevojshme për t’u tharë dhe për t’u përgatitur para mbjelljes.

 

“Toka duhet të punohej dhe të rrinte pak kohë, të merrte diellin. Ne e korrëm në prill se kishte qëndruar e përmbytur, misri u kalb dhe infeksioni mbeti brenda. Pastaj brenda pak ditësh u bë plugimi, frezimi dhe mbjellja. Detyrimisht do të ketë këto probleme”, u shpreh Ymeri.

 

 

E njëjta situatë është edhe për fermerë të tjerë në këtë zonë. Fermerja Bike Ymeri thotë se ka mbjellë rreth 17 dynymë misër, por këtë vit nuk pret të marrë prodhim.

 

“Krimbi i ka rënë. Këtë vit nuk marrim prodhim, shikojeni vetë si është. Dëmtimi mendoj se ka ardhur nga përmbytja dhe kanalet. Nuk ka ndodhur më parë. Më parë na ka rënë miza, e kemi bërë me ilaç, por raste të tilla nuk kemi pasur. Këto janë të ardhurat tona. Djali ka katër fëmijë, këtu e mbajmë familjen. Unë jam 77 vjeç dhe gjithë jetën kam punuar. Si mos të më vijë keq për mundin”, tha fermerja.

 

 

Nga strukturat e bujqësisë në Bashkinë Maliq bëjnë me dije se rreth 50 hektarë janë prekur nga ky dëmtues. Sipas specialistëve, bëhet fjalë për një vatër që shfaqet periodikisht, rreth një herë në katër vite, ndërsa dëmi i shkaktuar në bimë është i pakthyeshëm. Specialistët shpjegojnë se larva dëmton sistemin rrënjor të misrit dhe më pas kalon në fazën e fluturës, duke shkaktuar dëmtime edhe në pjesën e sipërme të bimës.

Lufta ndaj këtij dëmtuesi kërkon ndërhyrje me preparate të posaçme, ku një nga mënyrat më efikase është përdorimi i dronëve për shpërndarjen e ilaçit në parcelat ku makineritë nuk mund të futen.

Sipas tyre, kostoja e ndërhyrjes me dron është rreth 650 lekë për dynym. Fermerët e Maliqit kërkojnë ndërhyrje dhe mbështetje konkrete, pasi kjo është një tjetër humbje pas dëmeve të shkaktuara nga përmbytjet. Për shumë prej tyre, misri është burimi kryesor i të ardhurave dhe ushqimit për familjet, ndërsa një sezon i humbur përkthehet në vështirësi të mëdha ekonomike./CNA





Lajmet e fundit nga