Edicioni i 12-të i "Koko Fest"/ Korça, në atmosferën e komedisë

1 Shtator 2025, 12:37, Qyteti im CNA

Edicioni i 12-të i "Koko Fest"/ Korça, në

Qyteti i Korçës është veshur sërish me atmosferën e humorit e të artit skenik. Ka nisur edicioni i 12-të i festivalit të komedisë "Koko Fest", një prej ngjarjeve më të rëndësishme kulturore të këtij qyteti. Në teatrin “Andon Zako Çajupi” publiku përjetoi një mbrëmje të veçantë, ku premiera “Një martesë, një divorc, një funeral” çeli zyrtarisht festivalin duke sjellë duartrokitje dhe shumë të qeshura.

Regjisorja Rovena Lule

Regjisorja Rovena Lule, e emocionuar për pjesëmarrjen e saj të parë në këtë festival, tha se përveç kënaqësisë së të qenit në Korçë, shfaqja përcjell një mesazh të thjeshtë, por të madh, që miqësia është forca që na shoqëron gjithmonë.

"Kënaqësi e jashtëzakonshme të jem sot në 'Koko Fest'. Për mua është hera e parë që marr pjesë me një vepër. E kam ndjekur 'Koko Festin' pothuajse çdo vit, është një festival i jashtëzakonshëm. Jam tepër e emocionuar sonte. Për ne është hera e disatë që e risjellim shfaqjen në Korçë. Është një komedi për tri mikesha shumë të ngushta dhe jep mesazhin që miqësia është ajo që na qëndron gjithmonë pranë dhe nuk na leshon asnjëherë", shprehet regjisorja Lule.

Zamira Kita

Nga ana tjetër, aktorja dhe drejtoresha e teatrit të Korçës, Zamira Kita, theksoi se ky festival tashmë është kthyer në traditë të qytetit, një festë e përvitshme ku qytetarët kanë mundësi të shijojnë komedinë dhe të gjejnë atë çfarë është më thelbësore, të qeshin dhe të argëtohen.

"Sot filloi 'Koko Fest' dhe është viti i dymbëdhjetë që e bëjmë këtë festival komedie. Qyteti është në festë dhe salla është plot. Sot e kemi nisur me "Një martesë, një divorc, një funeral" ku unë kam pasur rolin tim. Shfaqja kaloi mirë, publiku qeshi dhe ky është qëllimi që publiku duhet të qeshë," tha Kita.

Egla Ceno

Për aktoren Egla Ceno, pjesëmarrja në "Koko Fest" është një privilegj, pasi, siç u shpreh ajo, festivali është një hapësirë ku takohen dhe vlerësohen mes artistësh, një vend ku arti bëhet bashkë dhe merr dimensionin e një ngjarjeje të madhe.

"Jam e lumtur që 'Koko Fest' u hap me një prodhim të teatrit të Korçës. Është një event fantastik sepse bëhen bashkë shumë artistë, shikojnë dhe vlerësojnë njëri-tjetrin. Është një festival në kuptimin e mirëfilltë të fjalës, ndaj dhe i uroj suksese," u shprej aktorja Ceno.

Ndërkohë, Franc Bregu, një prej aktorëve të rinj që ngjitet shpesh në skenën e Korçës, e sheh festivalin si një urë që lidh breza të tërë artistësh. Për të, "Koko Fest" është një mundësi për të ndarë emocionin me publikun dhe për të mësuar nga përvoja e kolegëve më të vjetër.

"'Koko Fest' këtë vit vjen në edicionin e tij të 12-të. Është një festë e madhe e teatrit sepse është një nga ngjarjet artistike të vitit që bëhet në Korçë, ku bën bashkë të gjithë artistët të vjetër e të rinj. Unë kam pasur fatin të jem pjesë disa herë me disa shfaqje të trupës së Korçës dhe është kënaqësi dhe emocion. Është bukur kur takon shokët e tu, kur i sheh të luajnë, por edhe kur takon breza të tërë artistësh që i kanë dhënë shumë skenës."

Me skena plot humor, me energjinë e trupave pjesëmarrëse dhe me emocionin e publikut që mbush sallën çdo vit, "Koko Fest" vijon të jetë një prej simboleve kulturore të Korçës. Një festival që jo vetëm i jep gjallëri qytetit, por edhe e kthen atë në një qendër të artit dhe argëtimit, duke e bërë Korçën kryeqytetin e komedisë në këto ditë feste./CNA