E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

“Buna Fest”/ Argëtim dhe sporte ujore në brigjet e lumit Buna

26 Gusht 2025, 15:00, Qyteti im CNA

“Buna Fest”/ Argëtim dhe sporte ujore në brigjet e lumit

“Buna Fest”, e organizuar në zonën e Dajçit, u kthye këtë fundgushti në një pikëtakim për banorët, të rinjtë dhe turistët, një festë që solli muzikë, kulturë dhe promovim të pasurive natyrore të lumit Buna.

Ky aktivitet, i organizuar nga Bashkia Shkodër në bashkëpunim me 'EKO Mendje' dhe Ministrinë e Ekonomisë, Kulturës dhe Inovacionit, kishte për synim të promovonte resurset e jashtëzakonshme të kësaj zone unike, duke e kthyer në një destinacion tërheqës për turizmin kulturor dhe natyror.

"Festa që organizohet sot në greg të Bunës është në vazhdën e festave që bashkia ka organizuar gjatë gjithë verës për të promovuar zonat tona më të bukura. Dajçi është një zonë shumë pjellore që merret me pemë dekorative dhe eksportin e tyre. Këtu duhet të vijnë edhe të rinj nga Shkodra apo turistë. Për të kuptuar që jo vetëm qendra, por kudo që shkon gjen vend për të kaluar bukur. Dhe ne kështu përmbyllim aktivitetet nga njëra zonë në tjetrën me qëllim promovimin e tyre",-tha Teuta Qyteza, zëvendëskryetare e Bashkisë Shkodër.

"Jemi në zonën e Dajçit në afërsi të Lumit Buna. 'Buna Fest' është një aktivitet që organizohet për herë të parë në këtë zonë, një zonë shumë aktraktive, e cila është kthyer prej turistëve dhe banorëve si tejet e frekuentuar. Është vetëm 11 km larg qytetit dhe mund të vihet me biçikletë. Zonë që ofron sidomos në verë shumë si p.sh. plazhe të tilla të veçanta. Sot vendosëm ta zhvillojmë këtu festën në kuadër të festave që ofron njësia administrative. Është një zonë që duhet promovuar edhe përmes aktiviteteve të tilla",-tha Mirsad Basha, “EKO Mendje”.

Sportet ujore u kthyen në adrenalinë për turistët e ardhur nga vende të ndryshme, që shprehin përshtypjet e tyre:

“Unë vij nga Mbretëria e Bashkuar. Këtu në Shqipëri është e bukur, ka peizazh mahnitës, uji ishte i mrekullueshëm, liqeni ishte i mrekullueshëm, vetë turi që bëmë ishte shumë mirë, siç thashë, një përvojë e bukur. Shkova në Bosnjë vitin e kaluar, kështu që nga peizazhi atje prisja një natyrë të përafërt dhe kjo ishte ajo çfarë prisnim ekzaktësisht”.

“Është e pabesueshme ajo që shijuam. Ishte shumë sociale dhe meditive. Një paqe e vërtetë mes një gjelbërimi të madh jeshil ngado. Thjeshtë ec në lumë dhe ndihesh shumë mirë. Gjetëm një qetësi shpirtërore. Jam nga Oksfordi, Mbretëria e Bashkuar dhe është hera e parë në Shqipëri dhe shijuam diçka të mrekullueshme. Një natyrë shumë e bukur që patëm mundësi ta përjetojmë”.

Atmosfera u mbush me muzikë live dhe DJ, panair ku përfshiheshin produkte agro-ushqimore lokale, artizanat tradicional, si dhe stenda me lule dhe pemë dekorative, veçanti e zonës. Të pranishmit shijuan një mbrëmje ndryshe, ku argëtimi u ndërthur me traditën, duke përforcuar imazhin e lumit Buna si një thesar natyror që meriton të zbulohet dhe të ruhet./CNA