web counter
LEXO PA REKLAMA!

SHKARKO APP

App Store
Google Play

E fundit!

x

Artistët kroatë, Klara Sovagovic dhe Josip Lukic, morën “Heart of Sarajevo” për filmin më të mirë studentor

22 Gusht 2022, 15:48, Qyteti im CNA
Artistët kroatë, Klara Sovagovic dhe Josip Lukic, morën
Foto nga eventi

Sarajevë: Regjisorët e rinj kroat, Klara Sovagovic dhe Josip Lukic, fituan “Heart of Sarajevo” për filmin më të mirë studentor me filmin “It's Not Cold for Mosquitoes” në Festivalin e 28-të të Filmit në Sarajevë. Ky çmim u dha nga Këshilli i Bashkëpunimit Rajonal (RCC), në një ceremoni të mbajtur mbrëmë në Sarajevë.

Urojmë Klarën dhe Josipin, për të tjera suksese në të ardhmen dhe karrierën e tyre. Nuk ishin dot të pranishëm në ceremoninë e mbylljes, por jemi të sigurt që do të dëgjojmë më shumë prej tyre në vitet në vijim dhe do t'i takojmë ndoshta në edicionet e ardhshëm të këtij festivali.

RCC jep çmimin “Heart of Sarajevo” në Festivalin e Filmit të Sarajevës, për filmin më të mirë studentor, që nga prezantimi i tij në 2017. Laureatët e mëparshëm të çmimit janë: Alexandru Mironescu, nga Rumani me filmin, “Summer Planning” (2021), Zeynep Dilan Süren, Turqi, me “The Great Istanbul Depression” (2020); Nikola Stojanovic, nga Serbia, “Sherbet” (2019); Hajni Kis, nga Hungaria me “Last call” (2018), Neven Samardzic, nga Bosnja & Herzegovina, me “Clean” (2017).

“Përgëzime Klara Sovagovic dhe Josip Lukic. Shpresoj që ky të jetë vetëm fillimi i mbarë i gjithë sukseseve të tjera që do të vijnë pas këtij, në karrierën tuaj të ardhshme. Ne në RCC jemi të kënaqur që po të ofrojmë një ndihmesë të vogël në këtë fillim karriere për ty. Investimi që ne po bëjmë tek të rinjtë e talentet e tyre është shumë i rëndësishëm dhe domethënës, sidomos edhe në industrinë e filmit që po zhvillohet gjithmonë e më shumë. Ndër vite, kontributi i regjistruar i sektorëve krijues në Prodhimin e Brendshëm Bruto në rajonin tonë varioi nga 0.5 në 5.72% dhe angazhoi në punë e projekte deri në 4.75% të popullsisë.

Shifrat na tregojnë se industritë e projekteve kulturore kanë shënuar rritje. Punësimi në sektorin e artit, argëtimit dhe rekreacionit u rrit deri në 67.8%. Rajoni ynë duhet të përfitojë nga kjo. Asnjë fond kombëtar i kinematografisë nuk mund të mbulojë i vetëm të gjitha kostot e realizimit të një filmi artistik, pa lënë këtu mënjanë dhe faktin se asnjë ekonomi e vetme nuk ka një ekosistem të tërë të përshtatshëm për krijimin e filmave.

Ne kemi të gjithë përbërësit e nevojshëm për krijimin e Fondit Rajonal të Filmit, dhe me angazhimin politik të qeverive, mund ta lehtësojmë atë përmes RCC-së për të ndjekur modelin e Fondit Nordik të Filmit dhe TV. Me këtë, ne mund të zhvillonim një revolucion kreativ të industrisë që do të kontribuonte në shkëmbimin më të mirë kulturor dhe rritjen ekonomike. Një euro e investuar në përmbajtjet audio-vizuale, sjell të ardhura të shumëfishuara”, tha Sekretarja e Përgjithshme e RCC- së, Majlinda Bregu.

Festivali i Filmit në Sarajevë është bërë festivali kryesor i filmit në rajon, i njohur si nga profesionistët e filmit ashtu edhe nga publiku i gjerë. Është një festival ndërkombëtar filmi me fokus të veçantë në rajonin e Evropës Juglindore, duke vendosur kështu në qendër të vëmendjes ndërkombëtare filmat, talentet dhe projektet e ardhshme nga rajoni. Programimi me cilësi të lartë, një segment i fortë industrie, një platformë edukative dhe krijimi i një rrjetëzimi për kineastët e rinj, autorët e filmit dhe përfaqësuesve të medias, së bashku me një audiencë me pagesë prej mbi 100,000, konfirmojnë statusin e tij si festivali kryesor i filmit në Rajon.

Western Balkans Youth Lab (WBYL) është një projekt trevjeçar i financuar nga BE dhe i zbatuar nga RCC që synon të ofrojë mundësi për të rinjtë, për të marrë pjesë në vendimmarrje. Projekti mbulon ekonomitë e Ballkanit Perëndimor në të cilat të rinjtë përbëjnë 21.27% të popullsisë së përgjithshme.

WBYL përpiqet të krijojë një dialog afatgjatë të strukturuar rajonal midis organizatave rinore dhe administratave kombëtare të fokusuar në zhvillimin e përbashkët të politikave, që do të rrisin pjesëmarrjen e të rinjve në vendimmarrje, për të përmirësuar mjedisin e përgjithshëm socio-ekonomik dhe lëvizshmërinë e të rinjve në ekonomitë e Ballkanit Perëndimor, përmes llojeve të ndryshme të aktiviteteve.

“Heart of Sarajevo” për filmin më të mirë studentor, i mbështetur nga RCC, synon të promovojë filma të realizuar nga studentë nga shkollat rajonale të filmit, fakultetet dhe akademitë e artit. Me këtë seksion shtesë të Programit të Konkurrencës, Festivali i Filmit në Sarajevë ofron një platformë të re për trajnimin e profesionistëve të rinj, të talentuar dhe të ardhshëm të filmit, që në fillim të karrierës së tyre. Programi fokusohet në filmat artistikë, dokumentarë dhe filma të animuar deri në 60 minuta, që janë krijuar në kuadër të procesit mësimor të shkollave rajonale të filmit. (Burimi: SFF)/ CNA.al





Lajmet e fundit nga