web counter
LEXO PA REKLAMA!

SHKARKO APP

App Store
Google Play

 “Veliaj, kryetari i kryekorruptuar”/ Shehaj: Nuk e lëshon karrigen se do të vjedhë akoma

4 Dhjetor 2025, 13:20, Politikë CNA


Kryetari i Partisë Mundësia, Agron Shehaj, tha nga foltorja e Kuvendit se shumë nga drejtuesit e bashkive në vend janë të korruptuar. Shehaj u shpreh se i kryekorruptuari është kryebashkiaku i Tiranës, Erion Veliaj.

Ky i fundit, sipas deputetit, nuk e lëshon karrigen, edhe pse ka pothuajse një vit në burg, sepse dëshiron të vjedhë akoma. Ai përmendi si kryebashkiakë të korruptuar edhe Erion Isain, Benet Becin, Eriselda Sefën.

“Bashkitë janë një tufë të korruptuarish, kjo sipas SPAK-ut. I kryekorruptuari është Erion Veliaj, pothuajse një vit në burg dhe vijon të qëndrojë në detyrë dhe nuk shkulet nga karrigia. Pavarësisht se e kanë çuar në burg. Nuk shkulen se duan të vjedhin. Janë Erion Isai, Benet Beci, Eriselda Sefa, etj. Janë pa fund kryebashkiakët që duan të vjedhin”, tha ai.

Shehaj shtoi më tej në një përgjigje për kreun e grupit të PS-së, Taulant Ballën, se është i shqetësuar për shkak të një hetimi ku përmendet emri i tij.

“Taulant Balla dha një shfaqje, që pasi ofendoi me një gjuhë bajate e shpërndau në të gjitha mediat: 'Taulant Balla shau Agron Shehajn'. Është i shqetësuar sepse dje u mor vendimi për një çështje që i takon atij. Apeli vendosi që çështja duhet të hetohet nga fillimi sepse duhet të konsiderojmë një organizatë kriminale sepse emri i Taulant Ballës është aty”, tha Shehaj. /CNA





Lajmet e fundit nga