"Mashtrues"/ Berisha akuza Salianjit: Po ndjek agjendë personale, s’ka folur kurrë në kryesi

4 Dhjetor 2025, 11:26, Politikë CNA

"Mashtrues"/ Berisha akuza Salianjit: Po ndjek agjendë personale,

Kryetari i Partisë Demokratike, Sali Berisha, ka folur jashtë Parlamentit për gazetarët lidhur me takimet e organizuara nga Ervin Salianji në Durrës.

Berisha hodhi akuza ndaj Salianjit se po ndjek agjendë personale dhe se, edhe pse është anëtar kryesie, nuk ka shtruar asnjë problem në mbledhjet e Kryesisë.

Kryedemokrati përgëzoi demokratët e Durrësit të cilët sipas tij e braktisën. Berisha shtoi më tej se në takim morën pjesë persona që kishin punuar për PS-në dhe që braktisën fushatën për të udhëtuar jashtë shtetit.

"Është një anëtar kryesie që në asnjë kryesi nuk ka shtruar asnjë nga këto probleme. Ai do të ketë agjendë personale, ta vazhdojë deri në fund.

Të deklarosh se militanti demokrat nuk dëgjohet nuk ka mashtrim më të madh. Para jush këto 4 vite militant demokrat ka votuar më shumë se kurrë në ekzistencën e tij. Të ndjekësh një agjendë personale, unë nuk kam asnjë kundërshtim. Unë i sfiduar? Ai po ndjek një agjendë personale. Edhe njëherë i përgëzoj anëtarët dhe demokratët e Durrësit, të cilët e braktisën, i përgëzoj. Aty ishin një grup të pakënaqurish që nuk u futën në listat për deputetë, kishte të tjerë që punuan për PS, ç’është e vërteta dhe që kanë frikë analizën që do bëhet se do t'u dalë.

Do të jetë analiza. Absolutisht jo, nuk janë ngritur këto akuza fare. Prandaj duhet analiza në parti. Se ata që i kanë tradhtuar militantët dhe punuan për Ani Dyrmishët dhe të tjerët, sigurisht do japin hesap para strukturave. Ata të cilët morën udhëtime turistike gjatë fushatës... po paralajmëroj llogaridhënie. Ata të cilët zgjodhën turizëm në mes të fushatës, ata sigurisht bashkohen se kanë qëllimet e tyre.

Edhe njëherë i përgëzoj demokratët e Durrësit dhe i garantoj se do ketë një llogaridhënie të plotë nga të gjitha strukturat, të gjithë drejtuesit. Thashë edhe njëherë, agjenda private, disa prej tyre që i njoha, pashë individë që kanë punuar për Ami Dyrmishët, pashë të tjerë që ia kanë mbathur në mes të fushatës për turizëm në mënyrë të dokumentuar. Tani këta nuk mund të më impresionojnë mua", tha Berisha. /CNA