“Te PD mund të pretendojnë që të votojnë alienët”/ Balla: Turpi do i ngelet atyre, ne nuk i kemi 84 mandate!

3 Shkurt 2025, 21:25, Politikë CNA

“Te PD mund të pretendojnë që të votojnë

Drejtuesi politik i PS për Diasporën, Taulant Balla, në një intervistë për “A2CNN”, preku edhe temën e ndryshimit të Kodit Zgjedhor për të lehtësuar pjesëmarrjen dhe regjistrimin e emigrantëve në zgjedhjet e 11 majit. Balla, tha se PS nuk ka 84 mandatet e nevojshme për ta bërë e vetme ndryshimin në Kodin Zgjedhor.

“E para është që ne nuk i kemi pasur asnjëherë 84 vota. PS nuk i ka patur kurrë 84 vota. Kemi qenë e vetmja parti që e kemi kërkuar votën e Diasporës historikisht, edhe në opozitë dhe gjatë gjithë këtyre viteve. Nuk na ka dhënë ndonjëherë populli shqiptar 84 mandate që të vendosim vetë dhe kemi qenë të detyruar e ndaj u vonua kaq vite vota e diasporës.

Tani jemi në mes të procesit të regjistrimit. Në këtë fazë kanë rezultuar dy elementë që nuk janë ngritur prej nesh por kanë marrë vëmendjen tonë dhe kemi reflektuar sapo filloj procesi. Gjëja e parë që kanë ngritur bashkatdhetarët dhe unë bashkohem me ta.

Është: “Po mirë ne shqiptarët e Diasporës do duhet ta paguajmë me lekë votën tonë. Unë në SHBA duhet të paguajë 45 dollarë për të nisur me postë fletën e votimit për në Tiranë".

Dhe këtu kryeministri tha se ne jemi të gatshëm t’i japim KQZ gjithë fondin e duhur për të mbuluar të gjithë shpenzimin në vajtje që e ka me ligj, por edhe në kthim. Tani kemi një element që duhet të ndryshojmë ligjin. A ka ndonjë opozitë në botë që thotë se do fitojmë. A thonë këta do fitojmë. Pikërisht, hajdeni bashkojeni votën.

Elementi dytë është se KQZ me të drejtë thotë se nëse kandidatët regjistrohen 50 ditë para zgjedhjeve, që do të thotë se 10 ditë do t’i marrë hartimi dhe primtimi i fletës së votimit, atëherë më ngelen më pak se 40 ditë për të dërguar fletën e votimit deri në Alaskë dhe për t’u kthyer fleta e votimit.

Atëherë me të drejtë KQZ thotë po këto partitë politike gati duhet t’i kenë kandidatët, përse të mos e rrisim afatin e regjistrimit të kandidatëve deri në 60 ditë. Kjo gjëja nuk e prek procesin.

Ngërçi me PD- Këta mund të vinë dhe më kërkesë lejohen të votojnë alienët. Jo! Sepse për PS, për këtë mazhorancë ne kemi përgjegjësi të garantojmë një proces të rregullt dhe zgjedhjet me standard të lartë.

E keqja është se në një farë mënyre do shkurtohet koha që ka KQZ. Do gjendet një instrument tjetër që të paguhet shpenzimi i postës, duhet gjetur patjetër, se ne nuk do i rëndojmë bashkatdhetarëve tanë se nuk do PD, dhe ata të paguajnë postën. Se është turp. Se këta thonë këta të Shqipërisë të mos e paguajnë fletën e votimit, kurse këta të Diasporës duhet ta paguajnë. Jo mor, do ta heqim”, tha Balla.

Në fund, Balla shtoi se nëse në seancën parlamentare të 13 shkurtit nuk ngrihen 84 kartona jeshilë për ndryshimin në Kodin Zgjedhor, atëherë turpi do t’i ngelej opozitës.

“Nuk është se është pa zgjidhje gjëja, turpi do t’i ngelet atyre që në fund do dalin lakuriq që do të thotë këta nuk e kanë dashur asnjëherë dhe te gjëja e fundit e bllokuan. Se kjo është gjëja e fundit dhe pastaj nuk ka më probleme. Thirrja ime për të gjithë kolegët deputetë, majtas, djathtas, qendër është që këtu duhet dalë përtej urdhrave politikë. Është moment historik”, u shpreh Balla. /CNA