web counter
LEXO PA REKLAMA!

SHKARKO APP

App Store
Google Play

E fundit!

x

“Të fuqizojmë rolin e mjekut”/ Koçiu: Mjekësia familjare do të shtrihet në të gjithë vendin

26 Maj 2025, 17:20, Politikë CNA

“Të fuqizojmë rolin e mjekut”/ Koçiu: Mjekësia

Për herë të parë, në zbatim të Strategjisë për Zhvillimin e Shërbimeve të Kujdesit Shëndetësor Parësor në Shqipëri 2020-2025 po vijon pilotimi i Qendrës së Mjekësisë Familjare në Tiranë dhe Vorë, një model i përqëndruar i ofrimit të shërbimeve të mjekësisë së familjes, në ato qendra që ofrojnë shërbime shëndetësore për rreth 30.000-40.000 banorë.

Ministrja e Shëndetësisë dhe Mbrojtjes Sociale, Albana Koçiu së bashku me Rektorin e Universitetit të Mjekësisë, Xheladin Draçini vizituan nga afër ambientet dhe funksionalitetet e Qendrës së Mjekësisë Familjare Nr.10, e cila prej një viti ofron një gamë të gjerë të shërbimeve të mjekësisë familjare.

Ministrja Koçiu tha se ky model shërbimi po funksionon më së miri dhe se Qendrat e Mjekësisë Familjare do të shtrihen në të gjithë vendin.

“Jam shumë e kënaqur që sot prej afro një viti kjo qendër ka filluar të funksionojë më së miri dhe është dallëndyshja e parë e Qendrave të Mjekësisë Familjare, të cilat ne synojmë t’i shtrijmë në të gjithë vendin. Po e fuqizojmë rolin e Mjekut të Familjes si figura kyçe që ndjek shëndetin e qytetarëve nga fëmijëria deri në moshën e tretë, me shërbime që përfshijnë ndjekjen e shtatzënisë normale, trajtime të thjeshta mikrokirurgjikale, menaxhimin e sëmundjeve kronike, dhe kujdes për shëndetin mendor”,-u shpreh Koçiu.

 Ministrja e Shëndetësisë u ndal dhe tek lehtësirat që sjell për qytetarët aplikimi i modelit të mjekësisë familjare për mënyrën e organizimit, përcaktimit të orareve dhe takimet me mjekët.

“Ky është një fillim i mbarë po ta shikojmë në mënyrën sesi është organizuar kjo qendër, si dhe në faktin që të gjithë pacientët që vijnë dhe trokasin janë të qartë për fashat orare, për takimet me secilin mjek, për marrëdhënien që vendosin mes mjekut dhe pacientit që është gjëja më e rëndësishme”,- sqaroi minstrja e Shëndetësisë dhe Mbrojtjes Sociale, Albana Koçiu.

Rëndësinë e mjekësisë familjare e solli në vëmendje edhe Rektori i Universitetit të Mjekësisë Tiranë, Draçini, i cili theksoi se mjekësia e Familjes nuk është vetëm pika e parë e kontaktit me qytetarin, por është dhe baza mbi të cilin ndërtohet edhe një sistem shëndetësor i qëndrueshëm dhe efikas.

Përveç shërbimit mjekësor, këto Qendra do të shërbejnë edhe si qendra të formimit profesional për specialistët e Mjekësisë Familjare.

Për këtë qëllim u nënshkrua edhe  marrëveshja e bashkëpunimit me Universitetin e Mjekësisë Tiranë për të rritur cilësinë e formimit profesional, ku studentët që ndjekin specializimin në Mjekësi Familjare do të mund të kryejnë praktikën në Qendrën e Mjekësisë Familjare Nr. 10.

Pas Tiranës dhe Vorës, ky model do të shtrihet në qytete të tjera, duke sjellë kujdes më cilësor, më të afërt dhe më të personalizuar për çdo qytetar./CNA





Lajmet e fundit nga