web counter
LEXO PA REKLAMA!

SHKARKO APP

App Store
Google Play

E fundit!

x

Ankimimi i rezultateve nga PD/ Nuri: Farsa elektorale është termi më i përshtatshëm për Shqipërinë

26 Maj 2025, 16:35, Politikë CNA

Ankimimi i rezultateve nga PD/ Nuri: Farsa elektorale është termi

Përfaqësuesi ligjor i Partisë Demokratike, Franc Nuri tha sot se ajo që kërkon PD është që të konstatohet dhe të provohet farsa elektorale. I ftuar në një dalje televizive, Nuri komentoi procesin e ndërmarrë nga PD për të ankimuar rezultatet e zgjedhjeve në të gjitha qarqet.

Nuri renditi intimidimin e zgjedhësve, keqpërdorimin e burimeve publike, të aseteve publike, rrugëve, asfaltit elektoral, si argumente që dëshmojnë se në fushatë ishte angazhuar makineria shtetërore.

Nuri deklaroi se farsa elektorale është termi më i përshtatshëm që mund të përdoret në këtë moment për rastin që i ka ndodhur Shqipërisë.

“Java që shkoi u mbyll shpallja e tabelave të rezultateve për këto zgjedhje nga Ilirjan Celibashi, kreu i KQZ, dhe nga momenti i shpalljes së rezultateve fillonte afati 5-ditor i ankimimit. Prandaj ne e nisëm në qarkun e Kukësit ankimimin për shkak se ishte rezultati i parë që u shpall, në kohë dhe duhej kapur dhe afati përkatës për ankimimin. Më pas qarqe të tjera që u shpallën ishin Berati, Korça, Dibra dhe Shkodra.

Përpara pak minutash depozituam, sikundër ju e thatë, në protokollin e KQZ, ankimimin për Beratin, për qarkun e Beratit ku njësoj si për qarkun e Kukësit kërkojmë pavlefshmërinë totale të zgjedhjeve në të gjithë qarkun dhe përsëritjen e tyre si pasojë e konstatimit të pavlefshmërisë së zgjedhjeve.

Të njëjtën gjë ju konfirmoj se do të depozitojmë brenda ditës së sotme edhe për qarkun e Korçës, jemi duke përfunduar edhe aty ankimimin përkatës. Ajo që ne kërkojmë është që të konstatohet dhe të provohet farsa elektorale.

Pjesa më e madhe e qytetarëve shqiptarë janë të vetëdijshëm, besoj unë, që 11 maji nuk pati zgjedhje, por ato më së paku ishin votime, në kuptimin që kishim të bënim me një farsë elektorale, e cila përfshin çdo lloj tjetërsimi vote, manipulimi vote që mund të shprehet me fjalë të tjera.
Termi farsë elektorale është termi i cili njihet dhe në nivel politik dhe global dhe është termi më i përshtatshëm që mund të përdoret në këtë moment për rastin që i ka ndodhur Shqipërisë.

Këto nuk ishin zgjedhje, gjithë makineria shtetërore ka qenë e angazhuar jo vetëm ditën e zgjedhjeve, jo vetëm gjatë numërimit, por ka qenë e angazhuar 6 muaj përpara zgjedhjeve. Të gjithë jeni dëshmitarë se çfarë ndodhi me fushatën në thonjëza të regjistrimit të qytetarëve nga diaspora. Argumentet për kërkesën e PD për pavlefshmërinë janë përdorimi i shtetit dhe i pushtetit në favor të PS.

Argumente të tjera janë: intimidimi i zgjedhësve, keqpërdorimi i burimeve publike, i aseteve publike, rrugët, asfalti elektoral, çakulli elektoral përmes investimeve publike. Argument tjetër janë ato që ne i kemi thënë dhe herë të tjera: falja e gjobave, avantazhe të tjera fiskale të ndryshme të dhëna shtresave të mëdha të shoqërisë. Të gjitha këto kanë ndikuar në zgjedhje, përveç këtyre kemi dhe argumente të tjera më specifikë për çdo qark”,-tha Nuri./CNA

 





Lajmet e fundit nga