web counter
LEXO PA REKLAMA!

SHKARKO APP

App Store
Google Play

Siguria/ Rama: Kemi 40% më pak vrasje, shqetësim janë aksidentet rrugore

3 Tetor 2023, 18:29, Politikë CNA

Siguria/ Rama: Kemi 40% më pak vrasje, shqetësim janë aksidentet

Siguria është një nga çështjet për të cilat kryeministri Edi Rama foli në konferencën për bilancin e sezonit turistik veror.

Rama tha se gjatë këtij viti ka pasur 40% më pak vrasje se vitin e kaluar. Përsa i përket vjedhjeve, ai deklaroi se Shqipëria është e fundit në Kontinentin Evropian.

“Që njerëzit të vijnë për të kaluar pushimet nuk mjafton t’i tërheqë bukuria që iu shfaqen nëpër ekrane dhe revista. Në radhë të parë iu duhet garancia e sigurisë. Këtë vit ne kemi pasur nivelin më të lartë të sigurisë në 30 e kusur vitet e fundit, minus 40% vrasje krahasuar me vitin e kaluar. Këtë vit Shqipëria ka befasuar shumë njerëz sepse jo ne, por Barometri Evropian e nxori vendin e fundit në Kontinent Evropian për vjedhje. I pari kampion Anglia. Dhe do ta përsëris për ata që s’e kanë dëgjuar, disa miq që erdhën, e kishin parë këtë gjë dhe ishin habitur”, u shpreh kryeministri.

Kreu i qeverisë përmendi aksidentet rrugore si një shqetësim dhe kërkoi që për të pasur siguri në rrugë të futet në shërbim inteligjenca digjitale.

“Kemi nevojë, kemi shumë nën kontroll përsa i përket aksidenteve rrugore, edhe ato janë në rënie, por nuk kanë të njëjtën rënie si krimet kundër personit apo kundër pronës. Pse? S’na duhet të investojmë më shumë, na duhet të fusim shumë më tepër inteligjencën digjitale, na duhet të fusim shumë më tepër monitorimin me kamera, na duhet të fusim shumë më tepër energji për të futur vetëdijen dhe për të edukuar drejtuesit e automjeteve. Është një front që duhet ta kemi shumë mirë parasysh”, theksoi Rama./ CNA





Lajmet e fundit nga