web counter
LEXO PA REKLAMA!

SHKARKO APP

App Store
Google Play

E fundit!

x

Si shkëlqeu Blendi Gonxhja në zgjedhjet e vitit 2025

22 Maj 2025, 17:20, Politikë CNA

Si shkëlqeu Blendi Gonxhja në zgjedhjet e vitit 2025

Si shkëlqeu Blendi Gonxhja në zgjedhjet e vitit 2025? Me një fushatë jo shumë të gjatë, i ardhur në Tiranë pasi Edi Rama largoi Erion Veliajn nga fushata. Pas Ogerta Manastirliut dhe Elisa Spiropalit, kryeqytetit iu shtua dhe Blendi Gonxhja.

Ky i fundit, ish-nënkryetar i Bashkisë Tiranë, dikur krahu i djathtë i Edi Ramës, njeriu që mori përsipër përmbytjen e kryeqytetit, por pa asnjë faturë. Thjesht dhe vetëm me një kosto politike, dha një dorëheqje.

Kujtojmë se në vitin 2002 Tirana u përmbyt nga hapja e portave të Liqenit Artificial. Edi Rama në atë kohë nuk ndodhej në Shqipëri, faturën e mori Gonxhja. Pas kësaj Gonxhja iku në emigracion, filloi një aktivitet me agjenci autobusësh, nuk dihet si ka filluar, cili ka qenë burimi i të ardhurave.

Si shkëlqeu Blendi Gonxhja në zgjedhjet e vitit 2025
Pamje nga përmbytjet e vitit 2002 në Tiranë

Më pas vazhdoi në Shqipëri me makinat me qira, derisa një ditë Edi Rama i kthehu sytë dhe e mori e bëri drejtor, duke i dhënë një institucion të rëndësishëm siç është Drejtoria e Përgjithshme e Shërbimeve të Transportit Rrugor, tashmë përfshin patentat, kolaudimet etj. Bledi Gonxhja u rikthye pa mbajtur asnjë përgjegjësi për Tiranën e përmbytur.

U rikthye në politikë drejtor, u akuzua shumë për korrupsion, për tenderë në drejtori të ndryshme. Ka pasur akuza se janë paravendosur restaurimet, investimet, por të gjithë këta janë zëra opozitarë mediatikë që ngelën te drejtoria, derisa një ditë Rama vendosi ta bënte një superministër, duke i dhënë një ministri të madhe, u bashkuan shumë institucione dhe agjenci, përfshirë këtu Agjencinë e Blerjeve të Përqendruara, me zullume, skandale.

Një superministri për Blendi Gonxhen që do të përfundonte kandidat në Kombinat dhe ajo që ra në sy është se Blendi Gonxhja është njeriu më i votuar në Shqipëri, rreth 24 mijë e 800 vota.

Si shkëlqeu Blendi Gonxhja në zgjedhjet e vitit 2025

Është njeriu më i votuar dhe mbi Erion Braçen.

Si shkëlqeu Blendi Gonxhja në zgjedhjet e vitit 2025

 

A është Gonxhe socialist më shumë se Braçe?

A ka socialistë që e votojnë Gonxhen? Çuditërisht sinjali i parë u dha në Vorë, aty ku opozita ka akuzuar se ka pasur tentakula të krimit të futura në kuti dhe zërat janë të qartë dhe akuzat e opozitës se elementë të botës së krimit ishin afër Blendi Gonxhes. Nuk mund të jetë çudi. Është akuzë politike apo e vërtetë kjo duhet provuar. 

 

Ku i gjetën votat, tre socialistët më të votuar?

Fakti që Blendi Gonxhja shkëlqen me 24 mijë e 800 vota nuk është për të mos u hetuar nga SPAK-u, për të mos u verifikuar. Siç janë dy kandidatët e tjerë, Sara Mila me rreth 20 mijë vota në Elbasan, kandidatja e krimit që artikulon Berisha.

Si një njeri i panjohur shkon në Elbasan dhe “grin” çdo socialist, merr jo pak, por rreth 20 mijë vota. Dyfishin e votave të kandidatit që ka marrë më shumë vota nga Partia Socialiste pas Sara Milës, siç është Saimir Hasalla.

Si shkëlqeu Blendi Gonxhja në zgjedhjet e vitit 2025

 

Një kandidat i tretë që shkëlqen, por Gonxhja është vezullues, është ai i Durrësit, Arkend Balla, që ka rreth 20 mijë vota. Nuk mundën dot ta thyenin as deputetë që kanë qenë në Parlament dhe Arkend Balla u akuzua për lidhje me krimin.

Si shkëlqeu Blendi Gonxhja në zgjedhjet e vitit 2025

Këta janë tre kandidatët më të votuar në Shqipëri. Blendi Gonxhja, që filloi të shkëlqente nga Vora. Arkend Balla që është akuzuar se ka lidhje me grupet kriminale që së fundmi u goditën nga SPAK-u dhe Antimafia italiane apo kandidatja e Elbasanit, Sara Mila, e cila në qarqet politike dhe mediatike shpallet si kandidatja e Suel Çelës.

 

A do të merrte Gonxhe 24 mijë vota po të mos ishte ministër?

Këta janë tre emrat që kanë marrë më shumë vota. Kuptohet Blendi Gonxhja ka marrë 24 mijë se është dhe ministër.

Po të mos kishte qenë i tillë dhe po të mos kishte pasur mbështetjen, ndoshta dhe orientimin e kryeministrit Rama dhe të atyre tentakulave të nëntokës që fillojnë në Vorë, shkojnë në Kamëz dhe shpërndahen në të gjithë Qarkun e Tiranës, jo që s’do të kishte marrë 24 mijë vota, po ndoshta s’do të kishte hyrë fare pasi nuk e pranon dot kush në Partinë Socialiste se Blendi Gonxhja pa qenë ministër dhe pa lidhje të dyshimta apo mbështetje nga segmente kriminale, blerje votash, biznesi etj., të gjitha ngelen për t’u verifikuar që çuan Blendi Gonxhen rreth 25 mijë vota.

Të ketë ky i fundit më shumë vota se Xhemal Qefalia në Tiranë?! Apo se Pandeli Majko, Toni Gogu, Blerina Gjylameti apo Olta Xhaçka?! Apo pa ato që thamë më sipër, Blendi Gonxhja të ketë më shumë vota se Erion Braçe apo dhe Fatmir Xhafaj? Të ketë më shumë vota se Mimi Kodheli apo Ermonela Felaj?!

Blendi Gonxhja çfarë u thotë socialistëve përveç përmbytjes së Tiranës? Asgjë. Thjesht dhe vetëm u katapultua si një superminsitër, u vërsul në fushatë me të gjitha bateritë, pa kursyer asgjë dhe i shkëlqeu rezultati 24 mijë e 800 vota, që tregon se nuk ka ndonjë ndryshim të madh as nga Sara, as nga Arkendi, por është si ata.

Vetëm se ka një ndryshim, ata i mbështeti krimi direkt dhe shpërthyen atje sipër në lista duke habitur ndoshta dhe Edi Ramën. Gonxhja justifikohet se është goxha ministër dhe e duan shumë dhe është krenar për votat që i dhanë banorët e Tiranës njeriut që mbyti Tiranën 23 vite më parë.

Njeriu që iku nga Tirana se e përmbyti, kthehet në Tiranë dhe përmbytjen që u bëri qytetarëve e merr në përmbytje votash. Ky është Blendi Gonxhe./ CNA





Lajmet e fundit nga