E fundit!

13:05 Aktualitet

Kallëzohet në SPAK Edi Rama

Grupi Parlamentar i PD-së kallëzon në SPAK Edi Ramën për v...

Kush humbi dhe kush fitoi?

22 Maj 2025, 13:48, Politikë Frida Mavriqi

Të gjithë flasin për rezultatin. Kush fitoi, kush humbi, sa vota mori ky apo ai. Por shumë pak flitet për çfarë ishte vërtet kjo garë dhe sa larg është Shqipëria nga një proces zgjedhor që i ngjan demokracisë, jo një loje të manipuluar.

Në terren, nuk pamë garë. Pamë presion mbi njerëz të thjeshtë. Pamë telefonata që vinin nga zyra të pushtetit për të orientuar votën. Pamë shpërndarje ndihmash, punësime të minutës së fundit, oferta që nuk refuzohen sepse jetesa është bërë e pamundur. E më pas, u ulëm të gjithë para ekraneve të numërimit për ditë me radhë të shikonim rezultatin sikur gjithçka ishte “në rregull”. Por nuk ishte.

Pamë një administratë zgjedhore të politizuar, një numërim të mbushur me tension dhe luftë për transparencë. Pamë edhe qytetarë që nuk besojnë më, që votuan pa bindje, ose që nuk votuan fare, sepse ndihen të dorëzuar. Dhe kjo është më e rënda: dorëzimi kolektiv përballë një sistemi që nuk ndryshon kurrë.

Ka nga ata që thonë “kjo është politika”. Jo! Kjo nuk është politikë.

Ky është manipulim, kontroll dhe përdhunim institucional i vullnetit të lirë. Të pranosh këtë si “realitet” do të thotë të bëhesh pjesë e tij.

Nëse do të kishim një proces real, ndoshta nuk do të fitonim as ne. Ndoshta rezultati nuk do të ishte shumë ndryshe. Por do ta pranonim me dinjitet, sepse drejtësia nuk matet me fitoren e një partie, por me ndershmërinë e garës.

Nuk mund të ketë ndryshim në këtë vend pa zgjedhje të lira. Pa një administratë zgjedhore të depolitizuar. Pa një sistem që nuk blen urinë, frikën, apo varfërinë e njerëzve. Dhe deri atëherë, çdo proces zgjedhor është thjesht një formalitet për të legjitimuar pushtetin që nuk vjen nga vota, por nga frika dhe pazari.

Nuk kemi humbur votat. Kemi humbur një mundësi që Shqipëria të bëjë një hap përpara. Por nuk do të jetë e fundit. Dhe nuk do të heshtim. Sepse s’ka demokraci pa votë të lirë. Dhe s’ka votë të lirë pa luftë për të.