E fundit!

21:22 Aktualitet

Tubimi i 45-të/ Protestuesit marshojnë në rrugët e Tiranës me thirrje kundër qeverisë

Protestuesit janë larguar nga Kryeministria pas përfundimi...

“Shqiptarët nga Shqipëria dhe Kosova janë aset për Mbretërinë e Bashkuar”/ Balla në Dhomën e Lordëve

27 Nëntor 2025, 21:09, Politikë CNA

“Shqiptarët nga Shqipëria dhe Kosova janë aset

Në mjediset e Dhomës së Lordëve, dhoma e ulët e Parlamentit britanik u organizua këtë të enjte një pritje për nder të kontributit të shqiptarëve nga Shqipëria dhe Kosova në jetën ekonomike, publike, akademike të Mbretërisë së Bashkuar.

Me ftesë të Lord Mann, Anëtar i pavarur i Dhomës së Lordëve, pritja u organizua nga Dhoma e Tregtisë Britani–Kosovë, Dhoma e Tregtisë Britani–Shqipëri dhe Dhoma e Biznesit të Diasporës Shqiptare në Mbretërinë e Bashkuar, me praninë e lordëve, deputetëve, ambasadorëve dhe dhjetëra bashkatdhetarëve.

Në këtë aktivitet në Londër ishte i ftuar edhe Kryetari i Grupit Parlamentar të Partisë Socialiste dhe Drejtuesi Politik i PS për Diasporën, Taulant Balla, i cili mbajti një fjalim vlerësimi dhe mirënjohjeje për komunitetin shqiptar në Mbretërinë e Bashkuar.

Balla solli shembuj të pranisë së shqiptarëve në çdo sektor por u ndal tek debati politik britanik që sipas Ballës nuk e nxjerr në pah këtë realitet. Ai u ndal tek debati politik britanik që sipas Ballës nuk e nxjerr në pah këtë realitet.

Kryetari i Grupit Parlamentar socialist tha se shqiptarët janë në tërësi, kontribues neto në ekonominë britanike, ndërsa varësia nga përfitimet publike mbetet minimale dhe se shqiptarët nga Shqipëria dhe Kosova nuk janë një problem për t’u menaxhuar, por ata janë një aset që duhet njohur dhe vlerësuar.

“Pasuria e vërtetë e një kombi nuk qëndron vetëm në territorin e tij, por në energjinë prodhuese të njerëzve që jetojnë dhe punojnë brenda tij. Jam këtu për të njohur dhe vlerësuar një komunitet, puna, përkushtimi dhe qëndrueshmëria e të cilit mishërojnë vetë idenë se prosperiteti ndërtohet nga njerëzit. Kohët e fundit, situata e një numri shumë të vogël familjesh shqiptare është amplifikuar në diskursin politik, duke e shndërruar një shifër statistikore margjinale në një narrativë shumë më të gjerë.

Në një vend me dhjetëra milionë banorë, këto shifra mbeten jashtëzakonisht të kufizuara, megjithatë rrezikojnë të formësojnë perceptime përtej peshës së tyre reale. Kjo ka rëndësi sepse, kur frika fillon të mbizotërojë mbi faktet dhe kur stereotipat zëvendësojnë provat, cilësia dhe drejtësia e debatit publik dëmtohen. Faktet flasin qartë. Gjatë periudhës së fundit, bashkëpunimi i ngushtë dhe efektiv ndërmjet institucioneve shqiptare dhe britanike ka çuar në një ulje drastike të mbërritjeve të parregullta nga Shqipëria në Mbretërinë e Bashkuar. Ajo që duhet dalluar gjithmonë qartë është aktiviteti kriminal nga njëra anë dhe komunitetet që respektojnë ligjin dhe punojnë ndershëm nga ana tjetër. Europa nuk është thjesht çështje gjeografie; ajo është një zgjedhje politike e vetëdijshme… zgjedhja për bashkëpunim mbi përplasjen, sundimin e ligjit mbi forcën, dialogun mbi konfliktin dhe të vërtetën mbi stereotipat”, u shpreh Balla.

Balla e mbylli fjalimin me një mesazh për bashkatdhetarët.

“Përgjegjësia jonë e përbashkët është të sigurojmë që diskursi politik të mbetet i ankoruar në realitet, duke iu përgjigjur frikës me fakte, demagogjisë me dinjitet dhe përçarjes me bashkëpunim.Në përfundim, ju falënderoj për kontributin tuaj, përkushtimin tuaj dhe për urat që ndërtoni çdo ditë mes shoqërive tona. Më lejoni t’ju përcjell urimet e mia me rastin e festave kombëtare të Shqipërisë, momente që na kujtojnë pavarësinë, dinjitetin dhe një identitet të përbashkët që shkon përtej kufijve”, tha Balla.