Rrëshqitja e dherave në Kodrën e Currilave/ Denoncimi i PD-së: Investimi 2 milionë dollarësh, aferë korruptive

23 Janar 2023, 13:00, Politikë CNA

Rrëshqitja e dherave në Kodrën e Currilave/ Denoncimi i

Sekretarja për Marrëdhëniet me Publikun e Partisë Demokratike, Jola Hysa, ka akuzuar Bashkinë e Durrësit në lidhje me situatën nga rrëshqitjet e dherave në Kodrën e Currilave.

Hysaj ka kujtuar premtimet boshe të qeverisë për investime në këtë zonë, ndërsa ka kërkuar hetim për dëm financiar nga zbatuesit e projektit.

Sipas Hysajt, investimi i dështuar 2 milionë dollarësh në Kodër-Currila tregon qartë se fsheh aferën korruptive në realizimin e punëve publike në Durrës.

“Ndërkohë që Kodra e Currilave vazhdon të degradojë sa herë që ka reshje shiu, qofshin këto të vogla apo të mëdha, gjithmonë e më shumë arrijmë të kuptojmë investimet sipërfaqësore të qeverisë dhe abuzimet që janë bërë dhe bëhen me qytetin e Durrësit.

Tashmë arrijmë të kuptojmë qartazi aferën korruptive në Prill 2015, ku vetem, pak javë para zgjedhjeve lokale, kryeministri Edi Rama u shfaq në krah të njeriut të tij të besuar, Vangjush Dakos për të bindur durrsakët se kishte ardhur fundi i rrëshqitjeve në zonën e Korea se Currilave.

Premtimet se investimi në këtë zonë do të eleminonte për një kohë të gjatë problemet në te po e tregojnë vit pas viti që nga 2015, që janë premtime boshe dhe abuzive.

Disa nga pikëpyetjet per kete projekt:

1.    Ku janë janë 50 mijë fidanë që u premtuan se do te mbilleshin ?

2.    Ku është pamja e transformuar e një kodre të gjelbëruar me një larmi bimësie, qe do te ndodhte brenda një harku 2-3 vjeçar “?

3.    Cili është atraksion i rëndësishëm qe u premtua për të gjithë ata që do të shfrytëzojnë vijën e shëtitjes në ajër të pastër.?

4. A kane studime te mirëfillta gjeologjike lejet e ndërtimit e dhëna në Kodrën e Currilave dhe Kodër Vilë?

5. Bashkia e Durrësit me detyrën e saj funksionale te mirëmbajtjes jo vetëm të zonës por dhe mirëmbajtjen e se ashtuquajturit projekt i cili do te sillte si risi dhe shëtitoren ndërmjet Kodrës së Currilave dhe Kodër Vilës... Kjo e fundit e tej mbushur me leje ndërtimi pa kriter.

Ky investim i dështuar 2 milion dollarësh në Kodër-Currila tregon qarte se fsheh aferën korruptive në realizimin e punëve publike në Durrës.

Por, pavarësisht këtij fakti, ende nuk është bërë asnjë ndjekje penale nga Prokuroria e Durrësit apo të ketë nisur ndonjë hetim për dëmin financiar të shkaktuar nga zbatuesit e projektit, Bashkia Durrës”, është shprehur Hysaj./ CNA.al