E fundit!

15:42 Aktualitet

Protestuesit para selive/ Balla: Kush qëndron pas tyre e ka gabim, mund të çojnë në vëlla-përplasje

Kreu i grupit të Partisë Socialiste Taulant Balla ka kriti...

"Qeveria të shpallë gjendjen e jashtëzakonshme dhe t'u përgjigjet dëmeve"/ Bozdo: Fshatrat e Beratit janë në mëshirë të fatit

26 Nëntor 2025, 10:43, Politikë CNA

"Qeveria të shpallë gjendjen e jashtëzakonshme dhe t'u

Nënkryetari i Komisionit të Ekonomisë, Eno Bozdo, në një deklaratë nga kryesia e Kuvendit ka kërkuar nga Ministria e Bujqësisë që të përllogarisë dëmet që kanë shkaktuar përmbytjet te fermerët e bashkive të prekura. Bozdo tha se në Qarkun e Beratit, fermerët e Kozarës dhe Tapisë në Kuçovë, Hingës, Samaticës, Goricanit, Dronovicës, Çifligut, Arrëzës, Banajt në Dimal, por edhe në fshatra dhe bashki të tjera të qarkut gjenden në mëshirë të fatit.

Deputeti deklaron se prej vitesh në zonat e përmbytura nuk është investuar në riparimin e kanaleve kulluese duke shkaktuar dëme te fermerët pasi mijëra gjedhë janë mbytur dhe qindra hektarë tokë dhe sera ndodhen nën ujë.

"Në javën e fundit, mijëra gjedhë u mbytën dhe qindra e qindra hektarë tokë bujqësore e mbjellë, në sera dhe fusha, u përmbytën të tëra, duke i lënë në mëshirë të fatit mijëra fermerë të Beratit, Korçës, Gjirokastrës, Sarandës, Lezhës etj., që kursimet e një viti të tërë pune e kishin investuar në sera dhe fushat e mbjella. Fakti që edhe pas një jave, ujërat ende nuk janë tërhequr, tregon qartë se problem nuk kanë qenë reshjet, por fakti që kanalizimet kulluese nuk funksionojnë!

Balta që ka mbetur pas tërheqjes së ujërave praktikisht ka shkatërruar gjithçka, si dhe e ka bërë të pamundur vjeljen e prodhimit, sepse tashmë nuk mund të hyhet më me mjete në parcela.

Në qarkun e Beratit, fermerët e Kozares dhe Tapisë në Kuçovë, Hingës, Samaticës, Goriçanit, Dronovicës, Çifligut, Arrëzës, Banajt në Dimal, por edhe në fshatra të tjera dhe bashki të tjera të Qarkut, sot gjenden në mëshirë të fatit!

Jo sepse shiu që ra ishte i papërballueshëm, por sepse pushteti vendor dhe ai qendror e kanë lënë infrastrukturën kulluese në mëshirë të fatit, pa investime, pa pastruar e pa mirëmbajtur. Këtë papërgjegjshmëri sot e paguajnë shtrenjtë fermerët e Beratit dhe të gjithë Shqipërisë.

Sepse nuk mjafton fakti që këta fermerë nuk marrin asgjë si mbështetje për prodhimin e tyre, por edhe kur përmbyten për faj të atyre që qeverisin, përsëri i lënë në mëshirë të fatit.

Në këtë qeverisje, fermeri shqiptar është i përbuzur, i lënë mënjanë, si qytetari më i fundit dhe më i parëndësishmi. Për atë nuk kujtohet njeri, veçse kur vijnë zgjedhjet dhe i kërkojnë votën.

Në dy bashkitë ku dëmet ndaj fermerëve janë më të mëdha, atë të Dimalit dhe Kuçovës, na rezulton se prej shumë vitesh nuk investohet as edhe një lek në mirëmbajtjen, riparimin dhe zhbllokimin e kanaleve kulluese bujqësore.

Të dy kryebashkiakët socialistë të këtyre bashkive, duke parë dëmet e shkatuara, kanë detyrim të bëjnë publike të dhënat për mirëmbajtjen e kanaleve kulluese. Sa investime kanë bërë? Cilat janë kompanitë fituese? Cila është përgjegjësia e tyre? Por nuk ka ndodhur një mirëmbajtje e tillë në terren, dhe këtu përgjegjësia bie e tëra mbi pushtetin vendor.

Ashtu siç edhe bashkia e Beratit është përgjegjëse për përmbytjen dhe dëmtimin e bizneseve dhe parkimit në qendër të qytetit, sepse projektimi dhe zgjidhja inxhinierike është bërë gabim, aty buzë lumit Osum.

Për këtë arsye i kërkoj ministrit të Bujqësisë dhe pushtetarëve vendorë, të përllogarisin sa më parë dëmin e shkaktuar çdo fermeri dhe çdo biznesi të Qarkut Berat dhe Shqipërisë, si dhe i kërkoj në të njëjtën kohë ministrit të Financave të alokojë fondin për dëmshpërblimin 100% të çdo dëmi të krijuar", deklaroi Bozdo.