web counter
LEXO PA REKLAMA!

SHKARKO APP

App Store
Google Play

Berisha: Opozita po përballet me sulme nga Marta Kos dhe Silvio Gonzato

25 Nëntor 2025, 13:17, Politikë CNA

Berisha: Opozita po përballet me sulme nga Marta Kos dhe Silvio Gonzato

Kryetari i PD-së, Sali Berisha, tha në konferencën e sotme me gazetarët se opozita po përballet me sulme nga komisionerja europiane, Marta Kos dhe ambasadori i BE-së në Shqipëri, Silvio Gonzato. Për këtë të fundit, Berisha tha se është “përcjellës i propagandës së kryeministrit Edi Rama”.

"Opozita ndodhet para disa sulmeve të targetuara të individëve të caktuar që janë në Komisionin Europian ose që përfaqësojnë në Shqipëri, Bashkimin Europian. Të ngjashme, por jo identike me qëndrimet e zonjës Kos, janë qëndrimet e ambasadorit Gonzato, i cili është një përçues i propagandës së paguar të Edi Ramës dhe i dezinformimit të papërmbajtur.

Lidhur me këtë të fundit, unë ju kam informuar juve se ky zotëri, për të përcjellë propagandën e Edi Ramës, u thotë deputetëve të Parlamentit Europian se kryetari i PD-së nuk është properëndimor pasi agjenda e tij është MAGA dhe jo integrimi. Ky është një trillim, një mashtrim, e kam dënuar njëherë dhe e dënoj prapë. PD ka qenë dhe mbetet absolutisht e përkushtuar në procesin e integrimit. Janë të gjitha integrimet e mëdha të Shqipërisë vepër e kësaj partie.

Kurse sa i përket mashtrimit se ai ka agjendë MAGA-n, MAGA si program i një partie konservatore, ka shtyllat e shkëlqyera të mbrojtjes së vlerave që partitë konservatore ndajnë, dhe unë i rikujtoj atij zotërie, se nuk e di ku ka qenë ai 32 vjet më parë kur Sali Berisha ka vendosur në Shqipëri taksën e dytë më të ulët në botë, TVSH-në më të ulët në botë pas një vendi tjetër dhe sistemin fiskal më konservator, më të ulët. Ka bërë gjithçka për konsolidimin e familjes, ka mbrojtur interesin kombëtar.
Pra, në qoftë se ka një konkordancë, ne jemi krenarë për vlerat që mbrojmë dhe nuk mundet kurrë asnjë njeri nga pozitat e ekstremizmit të majtë të bëjë gjah shtrigash kundër programit tonë. Në rast se presidenti Donald Trump këto vlera po i mbron dhe po i konsolidon në SHBA, ky është interesi i mbarë njerëzimit.

Apo pas mashtrimit tjetër se Chris LaCivita ka sjellë këtu çekun 9 miliardë euro në rast se fiton Shqipëria për t’u shkëputur nga BE-ja. Shqiptarët duhet ta dinë se kjo është propagandë e Edi Ramës dhe është përcjellë në të gjitha nivelet në kancelaritë në Bruksel. Këto janë shpifje", tha Berisha. /CNA





Lajmet e fundit nga