Orientimi drejt arsimit profesional/ Manastirliu nga Durrësi: Zgjedhja e zanatit, punë e sigurt

13 Tetor 2023, 11:34, Politikë CNA

Orientimi drejt arsimit profesional/ Manastirliu nga Durrësi: Zgjedhja e

Ka nisur nga shkolla e mesme profesionale “Hysen Çela" në Durrës, fushata e komunikimit intensiv të Ministrisë së Arsimit dhe Sportit, në bashkëpunim me Ministrisë e Financave dhe Ekonomisë, bashkitë, strukturat arsimore, mësues, nxënës dhe prindër, për orientimin e nxënësve drejt arsimit profesional, si rruga drejt punësimit të sigurt.

Ministrja e Arsimit dhe Sportit, Ogerta Manastirliu, tha se ky komunikim intensiv do të shtrihet në të gjitha shkollat e vendit, për të orientuar nxënësit drejt arsimit profesional dhe marrjes së një zanati.

“Ne, si Ministri e Arsimit dhe Sportit kemi vendosur të bashkojmë forcat me të gjitha strukturat, për t’u dhënë të gjithë nxënësve tanë dijet, njohuritë dhe aftësitë e duhura drejt punësimit të sigurt. Fushata që ne kemi nisur do të shtrihet në të gjitha qytetet e vendit dhe ka për objektiv që të informojë mësuesit, prindërit, nxënësit se sa e vlefshme është zgjedhja e një zanati, se sa e vlefshme është zgjedhja e një profesioni që në moshë të hershme”, - nënvizoi ministrja Manastirliu.

Gjatë fjalës së saj, ministrja e Arsimit dhe Sportit e vuri theksin te fuqizimi i bërthamave të këshillimit të karrierës në shkolla.

“Kemi vendosur që bërthama e këshillimit dhe drejtimit të karrierës në shkollë të mundet të operojë duke filluar nga klasa e gjashtë. Klasa e gjashtë, duke filluar nga ky vit, në kurrikulën e saj, do të ketë të përfshirë edhe orientimin e karrierës dhe kjo do të shtrihet edhe në klasën e shtatë, të tetë, përveç klasës së nëntë që aktualisht e ka këtë drejtim. Këshillimi i karrierës që në moshë të hershme do të përfshihet në mënyrë intensive në kurrikulën shkollore, në mënyrë që trinomi që ne kemi kaq të rëndësishëm: prind, nxënës, mësues, të mundet që të bashkërendojë edhe zhvillimin profesional të karrierës së çdo nxënësi”, -theksoi ministrja Manastirliu.

Të pranishëm në aktivitet ishin edhe kryetarja e Bashkisë së Durrësit, znj. Emiriana Sako, zv/Ministrja e Ekonomisë dhe Financave Olta Manjani, dhe përfaqësues të strukturave arsimore, të arsimit profesional, përfaqësues të biznesit, etj.

I pranishëm në këtë aktivitet ishte dhe përfaqësuesi i biznesit, Luan Bregasi, i cili u shpreh se për nxënësit e arsimit profesional, biznesi është i hapur dhe ofron mundësi të mëdha punësimi.

Durrësi është qyteti i parë ku ka nisur fushata e komunikimit të Ministrisë së Arsimit dhe Sportit dhe Ministrisë e Financave dhe Ekonomisë me mësuesit, nxënësit dhe prindërit për orientimin drejt arsimit profesional, për të vijuar në të gjithë vendin./ CNA