"Nuk tha asnjë fjalë për fyerjet e Hoxhës"/ Berisha për deklaratat e Ramës: Mashtrimet e së dielës

26 Prill 2026, 16:57, Politikë CNA

"Nuk tha asnjë fjalë për fyerjet e Hoxhës"/

Kryetari i Partisë Demokratike, Sali Berisha ka komentuar ditën e sotme deklaratat e bëra nga kryeministri Edi Rama në episodin e sotëm të podcastit të tij “Flasim”.

Në postimin e tij në rrjetet sociale, Berisha i ka cilësuar deklaratat e Ramës si mashtrimet e radhës të tij. Ai shprehet më tej se ekonomia shqiptare është në kolaps dhe se siguria ushqimore në vend është pothuajse ekzistente.

Ndër të tjera, Berisha shprehet se Rama nuk tha asnjë fjalë për mesazhin e ministrit të Jashtëm, Ferit Hoxha, të publikuar në media dhe ku ju referohej shqiptarëve të Maqedonisë së Veriut si “idiotë”.

Reagimi i plotë:

Dy fjalë për Podcastin “Serial i mashtrimeve” të Ramaduros…

Edi Rama në monologun e mashtrimeve të dielës sërish nxorri serialin e tyre pa u skuqur dhe pa u zverdhur. Premtoi se do të realizojë një marrëveshje partneriteti strategjik me Greqinë në një kohë kur, faktikisht, lejoi të skadojë traktati i miqësisë me këtë vend dhe krijoi një seri problemesh madhore të paqena më parë.

Së dyti, ai, në monologun e tij, u rikthye prapë tek paketa e mafies, që ai po e quan ‘paketa e maleve’. Çdo qytetar shqiptar duhet ta dijë se në vitin 2012, në parlamentin shqiptar u miratua ligji sipas të cilit të gjithë ata që investonin në zonat malore të Shqipërisë, do të ishin tetë vite pa asnjë taksë. Një nga ligjet e para që anuloi Edi Rama ishte pikërisht ky ligj dhe tani premton lehtësira për investime në tokën e babës, në një kohë kur me kadastrën e tij ka bërë batërdinë më të madhe mbi pronat dhe pronësinë. U zotua se paketa e maleve do të jetë një mundësi për banorët në një kohë kur ‘paketën e maleve’ ai e ka zhvendosur në Maminas dhe në zonën bregdetare. Në fjalën e tij premtoi për të gjithë ata që ndërmarrin nismë për të dyfishuar ndërmarrjen e tyre, do ketë lehtësira. E vërteta është se ekonomia shqiptare është në kolaps, se prodhimi bujqësor dhe prodhimi industrial janë në recesion prej dy-tre vitesh. Ekonomia shqiptare mbahet nga aparati i drogës, sektori i ndërtimit, me një tregues tre herë më të lartë se në Bashkimin Europian.

Në fjalën e tij, mashtrim, u ndal tek siguria ushqimore. Siguria ushqimore është pothuajse inekzistente në Shqipëri. Dhe kjo ka si shkak kryesor mafien dhe vetëm mafien shtetërore. Shqipëria sot është i vetmi vend i cili nuk ka autoritetin e sigurisë ushqimore, sepse atë e shkriu Edi Rama me pretekstin e mosfunksionimit të tij. Sigurisht që ai autoritet ishte siç janë agjencitë e tjera të këtij vendi të ngërthyera kokë e këmbë nga korrupsioni, por asgjësimi, zhdukja e tij pa u zëvendësuar me një autoritet të ri që të përmbushë një detyrim madhor siç është siguria ushqimore, është një akt kriminal.

Së fundi, dua të them këtu se nuk foli një fjalë të vetme, ndonëse u ndal tek Emiratet e Bashkuara Arabe, marrëdhëniet me Greqinë, por nuk tha një fjalë të vetme për fyerjen, për qëndrimin antishqiptar të zëvendësit të tij në politikën e jashtme, në të cilën në akt të papërgjegjshëm, të turpshëm, antishqiptar, vlerësohen qytetarët shqiptarë të Maqedonisë së Veriut si idiotë. Heshtja dhe mosreagimi i Edi Ramës dëshmon se kjo deklaratë e ministrit të tij të Jashtëm është porosi e tij dhe e lidhur direkt me të, mbasi e vërteta është se ky reagim erdhi kur një portal i Maqedonisë së Veriut kishte sulmuar Edi Ramën si një mafioz dhe tani pse nuk ngriheshin, pse nuk reagonin në demonstrata shqiptarët e Maqedonisë së Veriut, shpallen idiotë nga Edi Rama dhe ministri i tij. Akt i turpshëm, antikombëtar! /CNA