LEXO PA REKLAMA!

SHKARKO APP

Nëse Alibeaj sot priste të fitonte gjyqin, pse kërkoi shtyrje avokati i Bashës?

3 Nëntor 2022, 21:20, Politikë CNA
Nëse Alibeaj sot priste të fitonte gjyqin, pse kërkoi shtyrje
Fotomontazh - Gazment Bardhi, Lulzim Basha dhe Enkelejd Alibeaj

Gjykata e Apelit të Tiranës sot do të duhet të shqyrtonte konfliktin për vulën e Partisë Demokratike.

Gjyqi po mban pezull një nga çështjet e nxehta të konfliktit midis 2 PD-ve dhe vendimmarrja pritet të përcaktojë jo vetëm fatin e Partisë Demokratike, por edhe çdo vendimmarrje që kërkon vulën e kësaj force politike.

Pavarësisht firmave nëpër akt-padi, në fakt duket se palët janë Sali Berisha me Rithemelimin dhe Lulzim Basha me Enkelejd Alibeajn.

Berisha i Rithemelimit arriti që në 25 mars 2022, partia dhe vula të binte në duart e tij. Kjo pasi gjyqtari Agron Zhukri, njohu Kuvendin e 11 dhjetorit 2021.

Ai Kuvend përfshinte vendimet për shkarkimin e Lulzim Bashës, ndryshimin e statutit dhe Rithemelimin e PD-së.

Vendimi i Agron Zhukrit u ankimua nga grupi i Bashës në Apel. Grupi i Bashës çuditërisht nuk kërkoi të ishte palë e interesuar në procesin e depozitimit në gjykatë të vendimeve të Kuvendit të 11 dhjetorit!

Megjithëse e la veten pa përfaqësim në Gjykatë, Basha mblodhi Kuvendin e 18 dhjetorit 2021, në të cilin përveç emocioneve të Grida Dumës për prijësin Lulzim Basha, pati edhe ngjarje të tjera siç ishin përjashtimi nga partia personat që janë “non grata” nga SHBA-ja.

Grida Duma bëri thirrje që plakun ta linin në shejtaninë e tij.

Dhe ashtu u bë!

Nëse Alibeaj sot priste të fitonte gjyqin, pse kërkoi shtyrje

Kohë më parë kur Berisha ishte ende ai që vendoste në hije (siç do linte të kuptohej rëndom nga Basha publikisht dhe siç deklaronte rëndomë me këdo privatisht), Basha kishte mbledhur edhe Kuvendin e 18 korrikut 2021. Në atë Kuvend ishin miratuar një statut i ri i PD-së, si dhe anëtarët e organeve drejtuese. Pas atij Kuvendi, Basha (Berisha?), thjesht harroi të depozitonte praktikën në Gjykatë. Kështu e gjeti dhjetori kohë kur Basha dhe Juristët e tij, në 13 dhjetor 2021, (dy ditë pas Kuvendit paralel të Berishës) kërkoi që të depozitonte në Gjykatë vendimet e Kuvendit të 17 korrikut 2021.

Meqë do shkonin, grupi i Bashës çoi në gjykatë për regjistrim edhe vendimet e Kuvendit të 18 dhjetorit 2021, por Gjykata e Tiranës regjistroi vetëm vendimet e 17 korrikut 2021.

Gjykata zgjodhi vetëm një palë vendime dhe jo të dyja. (Kaosi duhet të ishte i plotë!)

Basha pretendon që gjykata duhet të depozitojë të dyja tufat e vendimeve, si ato të 17 korrikut edhe ato të 18 dhjetorit. Kjo kërkesë e grupit të Bashës është çështje që mbetet ende për t'u shqyrtuar nga Gjykata, ndërkohë që Apeli ka ankimimin për vendimin e Agron Zhukrit.

E meqë nuk u dukën boll ankimime, Berisha me të vetët ka depozituar në Gjykatë edhe 2 padi të tjera. Të dyja kanë arritur në Gjykatën e Apelit.

Njëra është padi që kundërshton ankimimin e Bashës për vendimin e Zhukrit dhe tjetra për të mos legjitimuar Bashën si palë në proces.

Trupa gjykuese për këtë padi përbëhet nga:

- Elona Toro

- Genti Shala dhe

- Edlira Petri.

Sot Apeli, pas disa shtyrjesh do të duhet të vendoste për njërën kërkesë. Atë që lidhet me rrëzimin apo lënien në fuqi të vendimit të shkallës së parë, i cili i dorëzoi PD-në Berishës.

Trupi gjykues përbëhet nga:

- Irida Kacerja,

- Genti Shala dhe

- Emona Muçi.

Genti Shala është pjesë edhe e trupit gjykues që pret të shqyrtojë paditë që kundërshtojnë ankimimn e Bashës për vendimin e Zhukrit dhe tjetrën për të mos legjitimuar Bashën si palë në proces.

Nëse këta gjyqtarë rrëzojnë vendimin e Zhukrit, PD-ja kalon sërish në duart grupit të Lulzim Bashës. Nëse lënë në fuqi vendimin e Zhukrit, PD-ja mbetet në duart e Berishës.

Ky ishte vendimi që pritej të merrej sot.

Por ndërsa gjithë mediat flasit për trembje të Berishës nga vendimi i pritshëm, askush nuk ka vënë re që seanca e sotme nuk u shty nga Berisha.

Shtyrja u kërkua nga avokati që përfaqësonin grupimin Basha.

Nëse vendimi i pritshëm paska qenë në favor të grupimit të Bashës, pse u kërkua shtyrja?

Do ishte rasti unik në nivel botëror kur një avokat, klienti i të cilit po fiton, kërkon të shtyjë zhvillimin e seancës që do i jepte fitoren.

Bindja e analistëve se ai që po humb është Berisha, duket pa kuptim kur shtyrja kërkohet nga avokati i Bashës.

Ose ne të gjithë nuk paskemi parë gjë akoma, ose Basha po i bën favor Berishës./ CNA.al

Lajmet e fundit nga