web counter
LEXO PA REKLAMA!

SHKARKO APP

App Store
Google Play

Kush i pagoi dy vizitat e dështuara të Erion Veliajt në SHBA?

23 Janar 2025, 11:24, Politikë REDAKSIONALE
Kush i pagoi dy vizitat e dështuara të Erion Veliajt në SHBA?
Erion Veliaj

Kryebashkiaku Erion Veliaj, i cili është nën hetim me 4 akuza nga SPAK-u, gjatë javëve të fundit ka tentuar të lëvizë shpesh në SHBA, të zhvillojë takime dhe të bëjë atje një betejë kundër SPAK-ut për hallet e tij të korrupsionit, fshehjes së pasurisë, pastrim të produkteve të veprës penale apo shpërdorimit të detyrës.

Kryebashkiaku i Tiranës u pa të largohej para Vitit të Ri nga Shqipëria dhe u tha se po udhëtonte drejt SHBA-së. 

Arsyeja e vizitës nuk u bë publike. Në rast se do të ishte një vizitë zyrtare, nëse do të kishte takime të tilla, të paktën do të ishin publikuar disa foto me kë ishte takuar dhe për çfarë ishte takuar, pasi Veliaj edhe kur del në rrugë dhe takon një fshesaxhi e bën publike.

Nga ana tjetër zëra pranë kryebashkiakut thanë se nuk kishte qenë në SHBA para Vitit të Ri, por ishte larguar me familjen në Vjenë.

Pyetja është shumë e thjeshtë:

Kush i ka paguar shpenzimet për lëvizjet e Erion Veliajt?

Kush i pagoi dy vizitat e dështuara të Erion Veliajt në SHBA?

Në rast se vizita e tij ka qenë private në Austri apo ka ikur me familjarët, me çfarë parash ka shkuar?

Në rast se nuk ka shkuar në SHBA, gjithmonë po e marrim të mirëqenë që ka qenë deri në Vjenë, se në SHBA mund të ketë shkuar dhe mund të ketë dështuar edhe kjo nuk diskutohet pasi siç e theksuam më lart të paktën do të kishte publikuar fotot e takimit.

Kryebashkiaku nuk heq dorë nga vesi i tij.

Vesi del me shpirtin thonë. Kur u rinis për në SHBA, por këtë herë është e provuar që dështoi në mënyrë spektakolare, jo vetëm nuk mundi të shkojë në një nga sallat ku u zhvillua ceremonia e Trump-it tek ambiente ku shumë politikanë shqiptarë ishin të pranishëm të cilët bënë prezente dhe fotot e tyre me kongresmenë, takimet që kishin pasur fotot në sallë e të tjerë, por Erion Veliaj nuk mundi dot të shkonte as në parkingun e pallatit të sportit ku bëhej takimi me turmën, një takim prezantues që shiteshin biletat.

Po është e konfirmuar që janë shitur bileta për një takim dhe Erion Veliaj ka mundur të ketë një nga ato, bileta e paguar nga një biznesmen, i cili është po në hetim nga SPAK-u për lidhjet me Erion Veliajn dhe bashkëshorten e tij, për fitimin e qindra mijëra eurove nëpërmjet një tenderi dhe dhënien pa qira të objektit për subjektin “Harabel” të Ajola Xoxës. (LEXO KETU)

Vetë biznesmeni ka qenë në SHBA ashtu si dhe vetë Erion Veliaj, por ky i fundit ndoshta nga frika e hetimeve të SPAK-ut apo ndoshta se nuk e ka pranuar kush nuk ka shkuar në takim, nuk ka qenë prezent në sallë, nga frika se mund të bëhej ndoshta dhe një Bilal i dytë në rast se do të hynte si gruaja e këtij biznesmenit apo nga frika e hetimeve të SPAK-ut apo nga paranojat e tij Erion Veliaj shkoi deri në SHBA, por nuk mundi të hynte, ku dhe bileta ishte prerë.

Pra, janë dy vizita të dështuara, qoftë në Austri apo në SHBA herën e parë dhe në SHBA tani. Lind pyetja:

Të dyja këto vizita kush i ka paguar?

Taksapaguesit e Tiranës? Se në rast se kryebashkiaku shkon për qejf të tij në SHBA apo në Kinë apo ku ka qejf ai por hallet e tij personale me drejtësinë, nuk mund t’i paguajnë qytetarët e Tiranës, nuk mund t’ua marrin fëmijëve të çerdheve apo të kopshteve, nuk mund t’ua marrin banorëve pa shtëpi, pa strehë, atyre me ndihmë sociale që Erion Veliaj të udhëtojë me luks dhe biznes në SHBA, të shkojë dhe të vijë sa herë të dojë, por dhe të dështojë pasi nuk ka takime zyrtare.

Atij i kanë vënë drunë. Së fundi ikën dhe disa diplomatë që i kishin ngelur me shpresën që mund të çante ndonjë shteg.

Mund të dojë të udhëtojë sa herë të ketë qejf Veliaj në SHBA, por duhet të shkojë me lekët e xhepit dhe këtë SPAK-u duhet ta hetojë, jo thjesht dështimin e tij se tashmë ia kanë prerë faturën përtej oqeanit, por paratë që po shpenzohen që Erion Veliaj të zgjidhë hallet me drejtësinë me lekët e taksapaguesve të Tiranës, me lekët e çerdheve dhe kopshteve të fëmijëve të kryeqytetit, me lekët e shkollave, me lekët e ndihmave ekonomike që nuk i marrin qytetarët, por shpenzohen për udhëtimet e kryebashkiakut të Tiranës./ CNA





Lajmet e fundit nga