web counter
LEXO PA REKLAMA!

SHKARKO APP

App Store
Google Play

E fundit!

x

"E ke humbur të drejtën të ankohesh"/ Muçollari i drejtohet Braçes: Pse nuk e ngrite zërin më parë?

22 Janar 2025, 18:20, Politikë CNA

"E ke humbur të drejtën të ankohesh"/ Muçollari

Anëtari i Kryesisë së Partisë Demokratike, Grigels Muçollari reagoi së fundmi duke komentuar deklaratat e Erion Braçes pas largimit të tij si drejtues politik i PS në Qarkun e Fierit.

Deputeti socialist u shpreh se partia e tij nuk e njoftoi për këtë lëvizje, ndërsa Muçollari shprehet se Braçe e ka humbur të drejtën të ankohet pasi ai ka heshtur kur shqiptarët kanë mësuar nga mediat e huaja se çfarë bën kryeministri në kurriz të tyre.

“Dakort z.Braçe, po pse keni heshtur kur shqiptarët mësojnë gjithçka nga media?

Që në krye dua ta them se jam dakort me deputetin Erion Braçe për shqetësimin që ngre në publik, se e kanë zhvendosur nga zona që përfaqëson prej kohësh, pa e pyetur, pa bërë një analizë. Dhe, më keq akoma, që këtë vendim, ai e ka marrë vesh në media.

Rregullat dhe meritokracia në një parti janë shumë të rëndësishme. Me aq mundësi sa kam pasur, kam luftuar që disa parime të zbatohen dhe në PD, ku jam prej më shumë se dy dekadash. Që janë vlerësimi i kontributeve, matja e rezultatit, dhe vota.

Asgjë e mirë nuk i ndodh një force politike dhe as vendit, kur këto norma shkelen. Aq më tepër, në rastin e zotit Braçe, ku përtej kundërshtive e mospajtimeve me të për 1 mijë gjëra, unë s’mund ta mohoj pasionin që ai shfaq për socialistët.

Mirëpo, ka disa momente që kanë kaluar në sytë e këtij përfaqësuesi, që janë injoruar prej tij, çka e bëjnë sot të jetë i vetmuar në pretendimin që ngre, dhe jo shumë i besueshëm në sytë e publikut.

Lëvizja e tij nga Divjaka në mënyrë arbitrare, sado e rëndë ngelet një problem i brendshëm i PS dhe një çështje lokale. Erion Braçe e di shumë mirë se njerëzit madje dhe deputetet këtu e kanë marrë vesh nga media se do të hapet në Lezhë një kamp për refugjatët që tentojnë Italinë. E kanë marrë vesh nga media se kjo qeveri, me lejen dhe infrastrukturën që kontrollon, ka lejuar trafik ndërkombëtar të mbetjeve të rrezikshme. Nga media e kanë mësuar shqiptarët se ishulli i Sazanit është dhënë.

Dhe shqiptarët e mësuan në media, se ka një projekt për ngritjen e shtetit Bektashi. Kur themi media, jo nga ndonjë intervistë e kryeministrit për shtypin tonë. Por nga media të huaja, të largëta me ne.

Në secilin rast, (dhe ka plot të tjera si këto), Erion Braçe nuk është ankuar, nuk ka ngritur zërin, nuk ka kërkuar llogari se përse nuk janë pyetur qytetarët përfshirë dhe veten e tij si deputet i maxhorancës për këto akte që i prekin drejtpërdrejt ata.

Poqese do të kishte luajtur rolin e deputetit si i besuar, i betuar në Kushtetutë, dhe në këto raste, sot halli i tij do të ishte dhe i të tjerëve, dhe shqetësimi i tij më legjitim. Nëse i vendosim në kandar, cila nga këto gjëra që kanë marrë vesh shqiptarët nga mediat, është më pak e rëndësishme me atë; nëse do të jetë apo jo ai, deputet i Divjakës?

Ndaj, mos të habitet z.Braçe kur të shohë se pakkush do të solidarizohet me të, pakkush do të prishë gjumin për këtë arbitraritet e nëpërkëmbje që vjen nga lufta brenda PS. Ai e ka humbur rastin të ketë simpatinë e njerëzve, kur ka mbyllur sytë sa herë shqiptarët janë trajtuar nga Rama si nënqytetarë dhe deputetet si nëndeputete si qënie që s’kanë të drejtë të dinë se çfarë vendimesh merr ai si Kryeministër". /CNA 





Lajmet e fundit nga