Këlliçi përgënjeshtron akuzat për financimin/ Janë qesharake, vijnë pas provave në SPAK për Veliajn

24 Qershor 2024, 13:14, Politikë CNA

Këlliçi përgënjeshtron akuzat për financimin/

Drejtuesi i PD-së për Tiranën, Belind Këlliçi

Drejtuesi i PD-së për Tiranën, Belind Këlliçi, ka reaguar në lidhje me akuzat e ngritura ndaj tij nga mediat e kryebashkiakut Erion Veliajt, të paguara nga inceneratorët.

Këlliçi tha se akuzat për financimin e fushatës janë qesharake. Ai deklaroi në "MCN Live" se ka depozituar në KQZ çdo qindarakë, ndërsa theksoi se çdo pagesë është kryer nëpërmjet bankës.

Sipas tij, akuzat për financimet vijnë pas denoncimeve të inceneratorëve dhe dokumenteve të reja që ka dorëzuar në SPAK për Veliajn dhe Bashkinë e Tiranës.

"Javën e kaluar unë kam çuar në SPAK provën përvëluese për përfshirjen e drejtpërdrejtë të Veliajt tek afera e inceneratorëve, dhe mashtrimi publik që ai ka bërë prej vitesh për studimin e IFC-së. Ka gënjyer deri para dy javëve. Unë kam firmosur dhe depozituar në SPAK këtë dokument autentik të vitit 2014, që Veliaj e kishte zhdukur nga protokolli i bashkisë dhe çdo institucion tjetër. Kjo është pikënisja e kësaj afere, ky dokument është përdorur nga Veliaj për koncesionin 30-vjeçar. Me sa duket e ka humbur toruan Veliaj, Carlo i Veliajt. Një tokë që ishte e destinuar për gjimnaz e ka marrë me para të buxhetit të shtetit. Bollino paguhet nga inceneratori i Tiranës, unë i kam nxjerrë faturat në Kuvend. Akuzat për mua janë qesharake. Si njerëz që janë pa nivel, nuk e kuptojnë që kanë bërë autogol. Unë kam depozituar në KQZ, çdo qindarakë që ka ardhur me bankë në fushatën time, edhe burimin nga kanë ardhur, dhe pse janë shpenzuar. Kam deklaruar çdo financim, çdo shpenzim, të gjitha që kanë ardhur në fushatë. Ftoj Carlo-n dhe Carlo-t e tjerë të bëjnë publik deklarimin e Veliajt që ka deklaruar zero lekë në fushatë.

Ka materiale pa fund në SPAK, që vetëm unë ia kam çuar, që vërtetojnë katërçipërisht përfshirjen e Veliajt dhe drejtorëve në aferë. SPAK-u mund të gjejë shumë më shumë informacion. A ka materiale SPAK-u për këtë çështje? Pa fund. A ka vullnet? Deri tani jo. A besoj unë te SPAK? Jo. SPAK-u nuk guxon as t’i përmendë emrin, as në aferën e inceneratorit, as në aferën “5D”. Dokumentet që ke kemi çuar janë fakt që bashkia është kthyer në organizatë mafioze, korruptive. Unë e shoh të pamundur që Veliaj të dalë i paprekur në këtë çështje sepse faktet kanë qenë përvëluese. Administratori i ‘5D’ vijon të shesë i qetë asete dhe apartamente! Që në fund ta marrin kompaninë me asete zero”, nënvizoi Këlliçi./ CNA