Inceneratori i Elbasanit/ Boçi: Hyrja mision i pamundur, ngjan me një burg të sigurisë së lartë

27 Gusht 2022, 13:34, Politikë CNA

Inceneratori i Elbasanit/ Boçi: Hyrja mision i pamundur, ngjan me

Nënkryetari i Partisë Demokratike, Luçiano Boçi, ka deklaruar se hyrja në inceneratorin e Elbasanit është një mision i pamundur dhe ngjan me një burg të sigurisë së lartë.

Në postimin e tij në rrjetet sociale, Boçi shkruan se, gazetarët konsiderohen rrezik dhe është e ndaluar hyrja e tyre, ndërsa punonjësit kontrollohen me detaje.

Boçi nënvizon se arsyeja pse ndodh e gjithë kjo është pengimi i shfaqjes së korrupsionit që është bërë dhe vazhdon të bëhet me 27 milion eurot e grabitura nga Rama.

Ai thotë se, inceneratori nuk është as në remont sepse ka që në dhjetor i fikur.

Boçi shkruan më të tej se, për ta ndezur e për ta mbajtur në aktivitet atë, duhen gati 15.000 litra naftë. Bashkia Elbasan gjysëm e falimentuar, nuk e përballon dot.

“INCENERATORI SI ALKATRAZ

Hyrja për në inceneratorin e Elbasanit është mision i pamundur.

Ngjan me një burg të sigurisë së lartë.

Gazetarët konsiderohen rrezik dhe ndalohen.

Punonjësit kontrollohen me detaje.

Mendoni se e gjithë kjo siguri është për të ruajtur plehrat?!

A mos vallë arsyeja e kësaj sigurie është imunizimi nga spiunët rusë që ata të mos mund të vjedhin teknologjinë unike të Ramës të grabitjes së parave?!

As njëra e as tjetra!

Arsyeja është pengimi i shfaqes së korrupsionit që është bërë dhe vazhdon të bëhet me 27 milion eurot e grabitura nga Rama.

Inceneratori nuk është as në remont sepse ka që në dhjetor i fikur.

Për ta ndezur e për ta mbajtur në aktivitet atë, duhen gati 15.000 litra naftë. Bashkia Elbasan gjysëm e falimentuar, nuk e përballon dot.

Energjia e pretenduar për prodhim as nuk mund të mendohet.

Ndërkohë nga mungesa e funksionit, pothuaj të gjitha valvolat dhe filtrat kanë dalë jashtë përdorimit dhe kostoja e zëvendësimit është e lartë.

Personeli është i përgjysmuar dhe nuk ka asnjë specialist.

Puna është tërësisht manuale, si dikur në fushën klasike të plehrave.

Punëtorët trajtohen si skllevër dhe paguhen po si skllevër modernë. Vetëm 290 mijë lekë të vjetra, ne shi, diell, mes helmeve dhe plehravez

Si në një procesion burgu, punonjësit detyrohen të dorëzojnë telefonat, a thua po hyjnë në Langley e jo në një fushë me male plehrash, nga frika e drejtuesve se mos faktojnë me foto skandalet brenda në incenerator.

Ndërsa SPAK që e ka në sekuestro burgun nuk sheh se si krimi i korrupsionit bën teatër para syve të tij!”, shkruan Boçi.