Zhurma me spiunët rus/ Rama: Kjo është qesharake! A jeni në vete apo jo?!

26 Gusht 2022, 11:47, Politikë CNA

Zhurma me spiunët rus/ Rama: Kjo është qesharake! A jeni në

Edi Rama

Kryeministri Edi Rama gjatë konferencës për mediat është ndalur dhe tek alarmi i ngritur për spiunë rus në Shqipëri, pas arrestimit të tre personave në uzinën e armëve në Gramsh.

Rama i cilësoi qesharake akuzat se bëhet fjalë për spiunazh, duke shtuar se me rëndësi është që të zbulohet qëllimi i vërtetë që fshihet pas akteve të këtyre shtetasve të huaj.

“Nuk kam pasur mundësi të shprehem për këtë, më lejoni t'ju them që mjergulla e ngritur për të ashtuquajtura objekte të rëndësisë së veçantë ishte për të qarë dhe për të qeshur, ato nuk janë objekte të rëndësisë së veçantë nuk janë fabrika që prodhojnë armë, ato janë karakatina dhe kanë statusin e sh.p.k. që janë absolutisht të falimentuara dhe që janë deri në pikën ku nuk kanë mundësi që të paguajnë dritat dhe kanë disa roje aty që janë për të mbrojtur atë perimetër nga zaptimet. Të thuash që po bëhej spiunazh duke fotografuar ato mbetje arkeologjike të komunizmit është qesharake, ajo që na shqetëson nga këta persona çfarë qëllimesh të vërteta kanë në vendin tonë.

Një mision spiunazhi që shfaqet me një veturë që thotë eja më kapni është qesharake. Shqetësimi ynë është ku është qëllimi i vërtetë, drejtësisë i takon. Kjo mjergull i shërbeu një sëkëlldie dhe njerëzit e zakonshëm bënë shumë humor për këto thirrje të urrejtësve profesionistë për rrëzimin e sigurisë kombëtare, ndërkohë që duhet të shikojmë nga hetimi dhe gjykimi se ku është qëllimi i vërtetë, nuk ka lidhje fare me objektet, a jeni në vete apo jo. Jemi në një kohë tjetër, këta janë personazhe të dyshimtë, është qesharake të thuash spiunazh. Këta persona fatmirësisht u ndaluan nga rojet që bënë detyrën e tyre janë persona të dyshuar për spiunazh, kjo është e qartë. Çfarë fshihet pas këtyre shfaqjeve, me ndihmën e kolegëve tuaj që flisnin për c4 dhe mbetje nukleare, ky spektakël u dha dhe iu vu në shërbim të këtij misioni për të bërë zhurmë të madhe. Grupet hetimore po bëjnë punën për të zbardhur ngjarjen”, tha Rama./CNA.al