web counter
LEXO PA REKLAMA!

SHKARKO APP

App Store
Google Play

E fundit!

x

GJKKO rëndoi akuzat për Beqajn/ Vokshi: Grupi i strukturuar falsifikoi dokumente me bekim të Ramës

23 Dhjetor 2024, 14:55, Politikë CNA

GJKKO rëndoi akuzat për Beqajn/ Vokshi: Grupi i strukturuar falsifikoi

Kryetarja e komisionit hetimor për koncesionet në Shëndetësi, Albana Vokshi, në një deklaratë për mediat komentoi kërkesën e GJKKO-së për SPAK-un për rëndimin e akuzave ndaj Ilir Beqajt. Rëndimin e akuzave Vokshi e komentoi si një fitore të opozitës, njëjtë siç bëri më herët kryedemokrati Sali Berisha.

Partia Demokratike, tha Vokshi, në ditët në vijim do të publikojnë raportin e plotë të deputetëve të opozitës në Komisionin Hetimor, si dhe do të depozitojnë një kallëzim të ri penal për të gjithë rrjetin e kompanive të krijuara dhe do të kërkojmë sekuestrimin e të gjitha aseteve të këtyre individive, në Shqipëri dhe në Itali.

Deklarata e Albana Vokshit 

Struktura e Posaçme hetoi për 4 vite rresht aferën korruptive të sterilizimit, dhe tentoi të mbulonte faktet flagrante që bënin fajtor Ilir Beqajn, Ogerta Manastirliun, ministrin e Financave dhe vetë Edi Ramën.

Për këtë aferë Partia Demokratike kërkoi ngritjen e një komisioni hetimor. Edhe pse u bllokua në mënyrë të vazhdueshme nga mazhoranca, edhe nëpërmjet nënkryetarit të emëruar, një personi nën akuzë për abuzim e shpërdorim detyre, Plarent Ndreca, opozita arriti të zbardhte një skemë të mirëfilltë kriminale në vjedhjen e parave publike. Atë që ne bëmë për 4 – 5 muaj, nuk e bëri dot SPAK-u për më shumë se 4 vjet.

Komisioni hetimor faktoi se si Ilir Beqaj në bashkëpunim me Klodian Rrjepajn, Ilir Rrapajn, Umbro Stachini-n kishin falsifikuar dokumentacionin për të përfituar këtë kontratë koncensionare. E gjitha kjo me bekimin e Edi Ramës.

Komisioni hetimor bëri atë që SPAK nuk e bëri në hetimin e tij, ndoqi paratë dhe zbuloi një rrjet të tërë kompanish të ngritura nga këta individë, kompani të cilat kanë zhdukur jo pak, por rreth 50.000.000 euro.

Komisioni hetimor ka zbuluar dhe lidhjen korruptive të Klodian Rrjepajt me kompaninë "Alba Light", lidhje e cila është fshehur nga SPAK-u.

Komisioni hetimor ka zbuluar dhe faktuar kompanitë e krijuara nga Ilir Rapaj, në emrin e tij, të afërmve e miqve të tij, dhe si kanë lëvizur dhe ku kanë shkuar dhjetëra miliona EURO.

Sot GJKKO pas zbardhjes së kësaj skeme nga ky Komision ka vendosur të rëndojë akuzat për këta shtetas duke i quajtur tashme NJË GRUP I STRUKTURUAR KRIMINAL.

GJKKO ka kërkuar dhe hetimin e shtetasit italian Umbro Stachini, i cili së bashku me Elisabeta Anzanelo, REFUZUAN disa herë të paraqiteshin për të dëshmuar para Komisionit hetimor.

Partia Demokratike, dhe unë personalisht, në ditët në vijim do të publikojmë raportin e plotë të deputetëve të opozitës në Komisionin Hetimor, do të depozitojmë një kallëzim të ri penal për të gjithë rrjetin e kompanive të krijuara nga kjo organizatë kriminale, dhe do të kërkojmë sekuestrimin e të gjitha aseteve të këtyre individive, jo vetëm në Shqipëri, por edhe në Itali.

Pas 12 viteve në pushtet të Rilindjes dhe parullës “Shëndetësi falas”, sot shqiptarët jo vetëm po vidhen, por edhe po vriten në dyert e spitaleve nga mungesa e shërbimit dhe e ilaçeve.

Ndaj sot është dita që të gjithë të protestojmë, edhe për të drejtën kushtetuese për shërbim shëndetësor cilësor.

Sot në orën 17.00 në marshimin në Tiranë

Për një jetë dinjitoze për çdo shqiptar!

Për të rikthyer liritë dhe të drejtat!/ CNA





Lajmet e fundit nga