Garë me Bashën për kryetar të PD-së?/ Alibeaj i shmanget pyetjes

24 Prill 2023, 21:53, Politikë CNA

Garë me Bashën për kryetar të PD-së?/ Alibeaj i

Enkelejd Alibeaj

PD e Enkelejd Alibeajt do të hyjë në zgjedhje për riformatimin e partisë pas zgjedhjeve vendore të 14 majit, sipas asaj që ka deklaruar vetë kreu i komanduar.

Mbrëmjen e sotme Enkelejd Alibeaj është pyetur nëse do të kandidojë për kryetar, por ai u shmang dhe foli për riorganizim të PD-së.

Gazetarja Elona Meço insitoi të marrë një përgjigje, madje e pyeti nëse do të garojë përballë Lulzim Bashës, por sërish ai refuzoi të flasë lidhur me kandidaturat.

Pjesë nga intervista:

Gazetarja: Do të kandidoni si kryetar i PD-së?

Alibeaj: Riorganizimi është nevojë e PD-së pas 14 Majit. Riorganizim në koncept së pari. Kjo kërkon që të përcaktosh kauzën tënde, ideologjinë, hapësirën e lirisë. Së dyti, është modeli, mënyra e organizimit që do të aplikohet. Janë të gjitha për t’u vendosur dhe për t’u aplikuar nga struktura drejtuese e PD-së. Nuk ka lidhje fare çështja e kandidimit apo jo, se kush do të kandidojë dhe kur. E rëndësishme është të përcaktosh një mënyrë të re të organizimit të PD-së. Kjo nuk varet nga mënyra sesi unë e imagjinoj, apo dëshira ime. Kjo do të vendoset nga strukturat, por ajo do të jete një parti që garanton: 1. hapësirën e lirisë së mendimit politik brenda partisë. 2. Të bazohet tek vota. 3. Të bazohet tek vlerat kryesore të kësaj partie 4. Të jetë joshëse sa më shumë për të gjitha flukset e shoqërisë, që të bëhen pjesë e PD-së, duke grumbulluar atë pjesë të shëndoshë të shoqërisë. Instrumentat janë nga më të ndryshëm.

Gazetarja: Ju po thoni që do të riorganizoni partinë dhe pastaj do të bëhen zgjedhjet për kryetarin?

Alibeaj: Unë besoj se ajo që është e nevojshme. Në situatën ku jemi ka nevojë që edhe vetë struktura partiake të pësojnë një lloj ndryshimi për mirë.

Gazetarja: Jua bëra pyetjen për kandidimin, pasi shtatorin e kaluar, kur ne kemi bërë bisedën e parë për emisionin “Pa Censurë”, ju e latë hapur këtë mundësi.

Alibeaj: Sepse nuk ishte atëherë dhe nuk është as sot një çështje për t’u diskutuar. Unë nuk jam nga ata që fsheh ambiciet apo që të kem drojë, por jam nga ata që them të vërtetën se cili është interesi kryesor sot i PD-së. Kryesore është që të kemi një PD që nga ky proces zgjedhor të dalë e fortë, në kuptimin që të ketë farkëtuar ideologjinë e vet, t’u jetë drejtuar mbështetësve të vet dhe më pas të kalohet në një fazë tjetër. Në fazën tjetër do të marrin pjesë të gjithë. Kushdo që pranon këto vlera kundër krimit, kundër korrupsionit, pro Perëndimit është i mirëseardhur në PD dhe do të ketë hapësirën për të bërë edhe karrierën e vet brenda partisë. Kështu e imagjinoj unë. Të tjerat me kohë.

Gazetarja: Nëse ju do të kandidoni për kryetarin e PD, siç unë e shoh të ndodhë, e mendoni Lulzim Bashën si rival?

Alibeaj: Konkluzionet që i nxirrni mund t’i keni të gabuara, pasi unë nuk ju thashë ç’do të ndodhë. Për mua sot është e rëndësishme që PD, e cila në këtë 1 vit e gjysmë është goditur, është plagosur, është penguar, i është marrë fryma etj., do të duhet të dalë pas zgjedhjeve edhe me një rezultat të denjë. Pas 14 majit ajo që duhet të ndodhë duhet të jetë një rikonceptim i mënyrës së organizimit të PD-së dhe sigurisht do të ketë edhe proces zgjedhor. Në proces zgjedhor çdokush është i lirë dhe kjo është alfa e lirisë, që çdokush të kandidojë. Sigurisht do të jenë votuesit, strukturat e PD-së që do ta përcaktojnë këtë gjë. Nuk mund të jemi në një sistem të dikurshëm që të përcaktojmë kush kandidonte dhe kush jo, siç bënte në fakt PD-ja deri para pak kohësh. Kjo është një nga gjërat që nuk do të ndodhë më në PD. Pastaj, sipas dëshirës, gjithësecili do të vlerësojë: është i aftë apo jo, ka dhënë apo jo për PD-në në këtë periudhë vërtet të dhimbshme dhe të sakrificës. Besoj që demokratët do të jenë të aftë për të gjykuar këdo në ambicien që do të ketë./ CNA.al