Fatmir Mediu zbardh telefonatën me Shkëlzen Berishën ditën e Gërdecit

13 Janar 2024, 09:20, Politikë CNA

Fatmir Mediu

Ish-ministri i Mbrojtjes, Fatmir Mediu, në një studio televizive ka folur për masakrën e Gërdecit dhe gjyqin që po zhvillohet për këtë çështje në Gjykatën e Posaçme.

Mediu ka treguar edhe telefonatat që ka bërë me Shkëlzenin ditën kur ndodhi ngjarja. Ai theksoi se nuk kanë biseduar për Gërdecin, por për çështje personale shëndetësore.

Intervista:

Pyetje: A ka pasur rol Shkëlzen Berisha në fabrikën e Gërdecit?

Mediu: Pse duhet të më pyesni mua, ai ka qenë në gjykatë...

Pyetje: A keni pasur telefonatë me të para dhe pas shpërthimit?

Mediu: Jo s'ka pasur para dhe pas shpërthimit. Ka pasur ditën përpara dhe pas shpërthimit nja 3 orë më pas për një çështje të interesit tim që nuk e përballoja dot në Shqipëri. Ka qenë çështje familjare. Çfarë do më zgjidhte mua Shkëlzen Berisha? T'i thosha të më hapë telefonin kryeministri. Unë kam qenë në kontakt me kryeministrin kur ka ndodhur kjo ngjarje.

Pyetje: A do bënit diçka ndryshe nëse do ktheheshit pas?

Mediu: Nga pikëpamja e praktikës nuk do bëja gjë ndryshe... unë kam respektuar hierarkinë ushtarake, s'kam sjellë nga jashtë, s'kam ndërhyrë kush është kolonel e gjeneral. Kë do pyesja nëse kam hierarkinë ushtarake që më sugjeron diçka dhe të dal e të them që s’duhet bërë kështu. Asnjëherë s’ka pasur asnjë reklamim te ministri i Mbrojtjes për demontimin në Gërdec. Ministri s’ka qenë asnjëherë në Gërdec, s’ka pasur asnjë kontakt me ata që mund të bënin biznesin... S’kam dashur të futem por meqë po më pyet, ka pasur një ekip amerikan ekspertësh që kanë vlerësuar ç'ka ndodhur. Kanë thënë 5 shkaqe të ndryshme dhe s’kanë vënë gishtin tek asnjëri. Saldimi i karrocës është njëri. Djali i të ndjerit Deliu që humbi jetën që pretendohet se ka salduar karrocën ka thënë që unë kam qenë në shtëpi nga ora 12:00 deri kur ka ndodhur shpërthimi dhe babai nuk ka salduar karrocë, unë kam qenë aty. Është një dëshmitar okular.... Jashtë kontekstit eksperimental është interesi kombëtar. Troç ne nuk kemi këshill të sigurisë kombëtare. S’kemi analizë të inteligjencës në Shqipëri. Marrim informacione i shikojmë dhe i hedhim në vendin që na takon si informacion konfidencial. S’kemi analizë të problemeve që shtron inteligjenca. Jemi vend anëtar i NATO-s./CNA