Dosja e skandalit të McGonigal/ Berisha: 95% e mediave censuruan lajmin

11 Janar 2024, 20:11, Politikë CNA

Dosja e skandalit të McGonigal/ Berisha: 95% e mediave censuruan lajmin

Ish-kryeministri Sali Berisha

Ish-kryeministri Sali Berisha në fjalimin e tij para mbështetësve poshtë ballkonit të banesës, ka deklaruar se bota çoi në sallën e gjyqit kryeministrin Edi Rama si të korruptuar.

Ndërkohë që lajmin për dosjen e prokuroëve të SHBA-së, e cila tregonte skemën e korrupsionit dhe të implikuarit, Berisha thekson se 95 % e mediave e censuruan.

Lideri i demokratëve nënvizon se, një ditë më parë, në mediat e SHBA, mediat e Europës dhe mbarë botës, superlajmi ishte se prokurori federal i Uashingtonit, dërgoi në gjykatë dosjen e McGonigal, në të cilën McGonigal pranon se ka marrë ryshfet nga Edi Rama.

Ai tha se në dosje pranohet se Edi Rama i ngarkoi atij misionin makabër të betejës, të shkatërrimit, kundër opozitës shqiptare dhe të shpalljes non-grata të Sali Berishës dhe betejës së egër kundër PD-së.

"Dëgjoj shpesh, lexoj në media të thonë se çfarë po bën bota ndaj kësaj që ndodh në Shqipëri.Bota po bën atë që duhet të bëjë, por ne kemi një problem të madh.Vendin e mbulon një vello e zezë e propagandës së mashtrimit të narkoregjimit të Edi Ramës.

Çfarë mund të bëjë bota më shumë se sa të dërgojë në sallën e gjyqit, Edi Ramën si të korruptuar? Çfarë presin shqiptarët më shumë se kaq?Dje, në mediat e SHBA, mediat e Europës dhe mbarë botës, superlajmi ishte se prokurori federal i Uashingtonit, dërgoi në gjykatë dosjen e McGonigal, në të cilën McGonigal pranon se ka marrë ryshfet nga Edi Rama.

Pranon pra, se Edi Rama, kryeministri i Shqipërisë, vend anëtar i NATO-s, korruptoi me para krimi shefin e kundërzbulimit të FBI për Nju Jorkun.Në këtë dosje pranohet se Edi Rama i ngarkoi atij misionin makabër të betejës, të shkatërrimit, kundër opozitës shqiptare. Të shpalljes non-grata të Sali Berishës dhe betejës së egër kundër PD-së.

Kjo dosje që u dorëzua në gjykatë, pranon se McGonigal ndërhyri te Edi Rama, pra me korrupsion, ndërhyri te i korruptuari Edi Rama për t’i dhënë licencë nafte, kujt thoni ju, ish-oficerit të policisë sekret, famëziut Agron Neza dhe ministrit të korruptuar, Damian Gjiknuri.

Atëherë a duhet të pyesim veten, çfarë mund të bëjnë më shumë se kaq, për ne?Sigurisht kjo është një mbështetje, një ndihmë e jashtëzakonshme për opozitën dhe çdo shqiptar.E megjithatë, nëse kjo pati efekte të një bombe të fuqishme në Europë dhe botë, të një eksplozioni të fuqishëm, ju e vutë re se dje dhe pardje, këtu në Tiranë, këtu në Shqipëri, 95 përqind e medieve, e injoruan, e fshehën, e censuruan lajmin.

Atëherë lind pyetja: çfarë duhet të bëjmë ne? A duhet të pranojmë më tej një kryeministër të skandaleve më të mëdha ndërkombëtare?

Në të gjithë hapësirën euroatlantike, Edi Rama është kryeministri i vetëm i damkosur nga drejtësia e SHBA si i korruptuar, i damkosur si njeriu që korruptoi shefin e kundërzbulimit të SHBA, i damkosur si njeriu që me korrupsion hoqi licenca dhe i dha licencë ministrit të tij dhe kalecit të sigurimit të Enver Hoxhës.

Ja pra, për çdo shqiptar, këto duhet të jenë alarm, këto duhet të jenë thirrje", tha Berisha./ CNA