Mbledhja e zhvilluar këtë të martë në Komisionin për Çësht...
Dosja “Partizani”, denoncimi: Malltezi në burg për shkak të denoncimeve për sarajet e Ramës
15 Nëntor 2023, 13:09, PolitikëCNA
Sali Berisha
Sali Berisha ka reaguar sërish sot për çështjen e privatizimit të ish-kompleksit sportiv "Partizani". Në një bashkëbisedim me gazetarët nga selia e Partisë Demokratike, kryedemokrati Sali Berisha ka akuzuar Edi Ramën se po mban të burgosur Jamarbër Malltezin për shkak se ky i fundit ka denoncuar sarajet e tij, pallatin e Lindës, betonizimin e Tiranës dhe aferën e inceneratorëve.
“Edi Rama mbrëmë dëshmoi qartë se ai personalisht është prapa aktit hakmarrës primitiv, të vendosjes antikushtetuese të masave të sigurisë ndaj meje dhe burgosjes politike të Jamarbër Malltezit, vetëm e vetëm pse ai në emër të interesit politik, ka denoncuar ndër të parët, ndërtimin e sarajeve të tij në Surrel, me gjatësi themeli 57 metra të gjata, ndërkohë që pronari i tyre, Edi Rama, kishte të deklaruar në ILDKP 3800 euro dhe 400 mijë lekë, duke faktuar kështu se sarajet e Surrelit u ngritën mbi krimin, korrupsionin, larjen e parave. Shtoj këtu se Jamarbër Malltezi, anëtar i Këshillit Kombëtar, kryetar i Departamentit të Mjedisit në PD, që mbahet i burgosur politik nga Edi Rama, i tmerruar prej tij, mbahet në burg sepse ka marrë në përputhje të plotë me ligjet e vendit, 140 metër tokë trashëgimi e pakontestueshme e familjes së tij, nga 1 miliard e 16 milionë metër katrorë tokë që qeveria e kryesuar nga Sali Berisha, u ka kthyer pronarëve të ligjshëm gjer në fund të vitit 2012.”- tha Berisha.
Po ashtu kreu demokrat ka sqaruar se vendimin për kthimin e ambienteve të klubit Partizani në një zonë urbane e ka marrë Rama teksa mbante detyrën si kryetar i bashkisë së Tiranës.
“Edi Rama në 10 qershor 2006 kur nuk ishte privatizuar asgjë mori zonën nga zonë sportive e bëri zonë urbane, këtë e bëri Edi Rama. E ka bërë kur nuk kishte asnjë privatizim aty, kur ato ishin objekte shtetërore. Pjesës tjetër ia kishte vënë syrin ose e paguanin, mori një studio zvicerane dhe ajo bëri masterplanin e kësaj zone. Studio bëntë masterplanin. Rama e la në këtë studim të gjithë zonën si zonë urbane, të cilën e firmosa unë në një kohë kur nuk kisha asnjë tagër ligjor pas vendimeve të Kushtetueses” – tha Berisha./CNA
