Diskutohet projektligji "Për Shërbimin e Jashtëm"/ Kapri: Çfarë do të ndodhë me nepotizmin?

19 Shkurt 2026, 13:10, Politikë CNA

Diskutohet projektligji "Për Shërbimin e Jashtëm"/

Gjatë diskutimeve në Kuvend për projektligjin “Për Shërbimin e Jashtëm”, deputeti i Partisë Mundësia, Erald Kapri, ngriti shqetësime mbi këtë projektligj dhe akuza për nepotizëm në emërimet diplomatike.

Kapri tha se në një kohë që flitet për rekrutime të reja në diplomaci, në shumicën e ambasadave dominojnë emërimet politike dhe familjare.

“Projektligji që kemi sot e keni cilësuar si reformë, jo ndërhyrje të momentit, ndonëse nuk pati kohë për të bërë debat në lidhje me shërbimin e jashtëm. Ju flisni për rekrutime të bëra në Diplomaci apo dhe Akademi, por në çdo ambasadë, 90% i ke emërime nepotike. S’flas për emërimet vetëm tuajat, por dhe të mëparshme. Përveç disa rasteve, të tjerët nuk janë kështu. Ju jeni krenare me emërimet në Ministrinë e Jashtme me gjithë situatën aty? Se ça keni emëruar ambasadorë, janë ish-deputetë të PS, fëmijë, kunetër, kunata, të zyrtarëve të PS-së. Nuk gjej një rast që studion dhe e merr që ta punësosh në Ministrinë e Jashtme. Çfarë do të ndodhë me nepotizmin në Ministrinë e Jashtme”, u shpreh Kapri në Kuvend.

Projektligji u prezantua nga ministrja e Jashtme, Elisa Spiropali, e cila e cilësoi projektligjin një instrument për të ngritur shërbimin e jashtëm në kushtet e një realiteti të ri gjeopolitik. Ndër të tjera, ajo shtoi se projektligji është një hap politik dhe institucional për ta përshtatur shërbimin e jashtëm me kohën në të cilën jetojmë.

“Ky ligj nuk është vetëm për Ministrinë e Jashtme. Është për rolin e Shqipërisë në botë. Është për besueshmërinë tonë si shtet. Është për të ardhmen europiane të vendit. Koha e një shërbimi të jashtëm të ri shqiptar ka ?lluar. Në këtë realitet të ri gjeopolitik, në këtë fazë vendimtare të integrimit europian dhe në këtë moment të ri të rolit të Shqipërisë në rajon, ne kemi nevojë për një shërbim të jashtëm që është në lartësinë e ambicieve tona kombëtare”, tha Spiropali.

Sipas saj, risitë e ligjit të ri kanë në fokus, ndër të tjera, fuqizimin e meritokracisë, por edhe statusit të diplomatëve shqiptarë.

“Ligji vendos standarde më të larta rekrutimi. Ai krijon Akademinë Diplomatike. Forcon dimensionin ekonomik dhe kulturor të përfaqësimit tonë jashtë vendit. Hap dyert për profesionistë me përvojë ndërkombëtare. Dhe përmirëson statusin e diplomatëve dhe familjeve të tyre. Por mbi të gjitha, ai synon të ndryshojë kulturën e përfaqësimit të Shqipërisë në botë. Nga një strukturë e mbyllur, në një strukturë të hapur. Nga një administratë procedurale, në një instrument strategjik të shtetit. Nga një qasje reaguese, në një qasje që propozon dhe udhëheq”, deklaroi Spiropali. /CNA