"A mund ta kem dhe unë vendimin 8 me 0 të GJK-së?"/ Balla-Bardhit: E ushtroni në mënyrë shembullore profesionin e gënjeshtrës

19 Shkurt 2026, 10:37, Politikë CNA

Kreu i Grupit Parlamentar të PS-së, Taulant Balla, i është përgjigjur kreut të Grupit të PD-së, Gazment Bardhit, për mbledhjen për imunitetin e Belinda Ballukut.

Balla u shpreh se në Kuvend nuk ka asnjë kërkesë për heqje imuniteti. Ndërkohë lidhur me vendimin e fundit të Gjykatës Kushtetuese për këtë çështje, ai tha se Bardhi gënjeu sërish, siç, sipas tij, e ka profesion.

“Të paktën për transparencë me qytetarët në Kuvend nuk ka asnjë kërkesë për heqjen e imunitetit. Ka një kërkesë apo dhënie autorizimi për masë sigurie. Sqaroni ata me të cilët flisni. Nuk ka kërkesë për heqje imuniteti. Jeni njoftuar ashtu si unë, se në datën 23 do të vijohet me mbledhjen. E dyta të gënjesh është profesion dhe ju e ushtroni këtë në mënyrë shembullore. Thatë se ka një vendim të Kushtetueses 8 me 0. A mund ta kem atë vendim, se unë e di se nuk ka një vendim. Sa i përket 8 me 0 ka një vendim 8 me 0 në leximin pa jurisprudencë, që thonë që GJKKO ka ndërhyrë në kompetencat e kryeministrit. I kam bërë thirrje Gjykatës Kushtetuese të na vërë në dispozicion se çfarë kanë gjetur anëtarët e kësaj gjykate. Kush je ti që thua se ky është projektligj antikushtetues, ti shprehu me votë. Sa për nismën tonë ne do ta vazhdojmë se garanton ndarjen e pushteteve në një republikë parlamentare”, tha Balla.

Bardhi më herët kërkoi që çështja për imunitetin e Belinda Ballukut të futet me urgjencë në rend dite të seancave plenare.

“Kuvendi i Shqipërisë duhet të ketë vetëm një pikë që ju e tërhiqni zvarrë. Kjo çështje është futja me urjgencë në rend dite e kërkesës së Prokurorisë për heqjen e imunitetit të Belinda Ballukut.

Për dy muaj jeni bërë pengesë për hetimin e korrupsionit ndaj zyrtarëve të lartë. Ky Kuvend nuk mund të bëjë sikur asjo çështje nuk është këtu dhe nuk ekziston. Jeni i vetmi vend në botë që miratoni një ligj për të mbrojtur veten., Nuk mund të pranojmë që të shndërrojmë këtë sallë në mburojë për të korruptuarit”, tha Bardhi. /CNA