Bilanci i zi i qeverisë, sipas Berishës

1 Shtator 2024, 20:49, Politikë CNA

Kryeministri Edi Rama

Kryetari i Partisë Demokratike, Sali Berisha, gjatë fjalës në protestën e përnatshme të mbështetësve të tij, bëri bilancin e zi të qeverisë.

Sipas tij, gjatë verës shpërtheu bota e krimit dhe e vjedhjeve si asnjëherë më parë. Ai deklaroi se mbi 60 shqiptarë u vranë nga klanet kriminale ose u vetëvranë.

Berisha tha se qeveria rriti me 2.2 herë faturën e zgjerimit të rrugës Tiranë-Durrës, faturën e rikonstruksionit të rrugës Tiranë-Plepa dhe me 100% faturën e bypasit të Elbasanit.

Kreu i PD-së ngriti gjithashtu akuzat se u grabitën zgjedhjet e Himarës dhe u vodhën shqiptarët me tarifën e tunelit të Llogarasë.

“Miqtë e mi, shtatori la prapa një verë e cila, siç ishte me temperaturat e papara më parë, ishte dhe me shpërthimin e botës së krimit, vjedhjeve si asnjë verë tjetër në histori.

Gjatë kësaj vere, mbi 60 qytetarë shqiptarë u vranë në rrugët e vendit nga klanet kriminale, ose vetëvranë në banesat e tyre. Gjatë kësaj vere rendi ishte në duart e krimit. Gjatë kësaj vere qeveria mori vendime në të cilat vodhi haptas qindra e qindra milionë euro.

Të dashur miq, vetëm tre javë më parë në një vendim, dyshja famëzeze Rama-Balluku rritën me 2.2 herë faturën e zgjerimit të rrugës Tiranë-Durrës, faturën e rikonstruksionit të rrugës Tiranë-Plepa. Rritën me 100% faturën e bypasit të Elbasanit.

Ndanë mënjanë për të blerë zgjedhjet, jo 10 apo 20, por mbi 250 mln euro, vetëm me një vendim që e morën në gusht, në piskun e vapës.

Të dashur miq, gushti filloi me zgjedhjet në Himarë. Ju jeni dëshmitarë se si nga zyrat i grabitën zgjedhjet, i ekzekutuan zgjedhjet pa u zhvilluar ato, ndërkohë narko-shteti iu rrënoi shqiptarëve turizmin, dhe kjo ishte vera e përmbysjes së turizmit, përfitimeve nga potenciali i madh turistik.

Kjo ishte vera e inagurimit të tunelit më të kushtueshëm të planetit, tunelit të Llogarasë. 65 mijë euro për frymë të cilën nuk e ndërton as shteti më i pasur në botë, por e ndërton hajduti i Gjipesë për pronat e tij dhe ryshfetet që ka marrë”, theksoi kryedemokrati./ CNA