E fundit!

14:51 Aktualitet

Pas më shumë se 5 orësh, Igli Tare del nga SPAK

Ish-futbollisti i Kombëtares shqiptare të futbollit, Igli ...

Berisha “sfidon” edhe Britaninë e Madhe/ Do të luftoj të pastroj emrin

22 Korrik 2022, 12:50, Politikë CNA

Berisha “sfidon” edhe Britaninë e Madhe/ Do të luftoj

Pasi SHBA e shpalli "non-grata", ish-kryeministri Sali Berisha deklaroi se ka paditur për shpifje Sekretarin Amerikan të Shtetit, Antony Blinken, në Gjykatën e Parisit.

Ndërkohë, sot në një deklaratë për mediat, Berisha “sfidoi” publikisht edhe Britaninë e Madhe, pas vendimit të kësaj të fundit për ta futur kreun e PD-së, në listën e zezë të personave që nuk u lejohet hyrja në këtë shtet.

Gjatë deklaratës së tij, Berisha theksoi se do vazhdojë të luftojë i palëkundur për të pastruar vendin nga krimi dhe korrupsioni, që sipas tij është e vetmja rrugë për të shpëtuar Shqipërinë dhe shërbyer interesit të qytetarëve te saj.

Po ashtu ka ftuar autoritetet britanike të dorëzojnë pranë organeve të drejtësisë të vendit të tyre, dhe pranë organeve të drejtësisë në Shqipëri, çdo fakt, provë apo dokument që disponojnë, ata ose kushdo tjetër, për akuzat që kanë ngritur kundër tij.

“Çdo vendim i bazuar në shpifje, mbi korrupsionin, është mbështetje reale për korrupsionin dhe krimin. Më mirë se kushdo këtë e dinë shqiptarët, të cilët, me mbështetjen masive pas shpalljes sime 'non grata', kanë dëshmuar se askush dhe kurrë nuk do të mund t’u shesë atyre shpifjet dhe mashtrimet për të vërteta, dhe aktet hakmarrëse politike si akte antikorruptive, apo t’i përdorë ato për t’i emëruar kryetarët e partive të tyre. Ftoj të gjithë t’i bëjnë një pyetje vetes: Përse këto sulme dhe shpifje, krejt bajate dhe pa asnjë bazë, vijnë plot 9 vjet pasi Sali Berisha ka lënë pushtetin?

Përse ato vijnë në një kohë kur nën qeverisjen e Ramës krimi ka kapur shtetin dhe vënë përfund Shqipërinë, kur vendi është kthyer në një plantacion droge dhe ku, sipas dosjeve të mirënjohura në Prokurori dhe raporteve të OSBE, bandat dhe krimi i organizuar blejnë vota për pushtetarët?

Përse ato vijnë në një kohë kur banditët kanë marrë mandate deputetësh dhe kryebashkiakësh, kur opinioni tronditet çdo ditë nga magnituda e aferës së inceneratorëve, e Butrinit dhe e portit të Durrësit, e qindra afera të tjera korruptive të qeverisë më të korruptuar në Europë të Edi Ramës dhe, akoma më shumë nga indiferenca e drejtësisë për të hetuar atë dhe qindra afera të tjera?

Përse ato vijnë në një kohë kur, ende nuk është shuar jehona e lidhjeve me krimin e organizuar dhe kriminelët, të dala qartë në përgjimet e Prokurorisë të dosjeve 184 dhe 339, të zbardhura edhe nga gazetat gjermane? Politikanët e këtyre përgjimeve, shokë me “çunat problematikë”, janë sot kryeministër dhe ministra.

Ironia e fatit është se, i pari që i bën publike këto vendime është Edi Rama.

Secili mund të zgjedhë t’u përgjigjet vetë këtyre pyetjeve, por përgjigjja ime është se, ashtu siç kam bërë deri sot, do vazhdoj të luftoj i palëkundur për të pastruar vendin nga krimi dhe korrupsioni, si rruga e vetme për të shpëtuar Shqipërinë dhe shërbyer interesit të qytetarëve te saj, deri ditën që ata do besojnë te Sali Berisha!

Në përfundim, ftoj autoritetet britanike të dorëzojnë pranë organeve të drejtësisë të vendit të tyre, dhe pranë organeve të drejtësisë në Shqipëri, çdo fakt, provë apo dokument që disponojnë, ata ose kushdo tjetër, për akuzat që kanë ngritur kundër meje.

Për të gjitha këto shpifje, unë do konsultohem me ekspertë për hapat ligjorë që do të ndërmarr për të mbrojtur nderin dhe dinjitetin tim dhe të vendit tim, për aq sa unë e përfaqësoj.”-tha Berisha.

Ndërsa, i pyetur nga gazetarët se cili do jetë hapi i radhës, Berisha tha se “Nuk mund të them hapin e tretë pa më këshilluar këshilltarët ligjorë”./CNA.al