Berisha: Pse akuzoj direkt Edi Ramën si autor ose porositës të sulmit

9 Dhjetor 2022, 12:47, Politikë CNA

Berisha: Pse akuzoj direkt Edi Ramën si autor ose porositës të

Kreu i PD-së, Sali Berisha, ka treguar se përse akuzon kryeministrin Edi Rama, për sulmin ndaj tij në protestën e 6 dhjetorit.

Në konferencën e përjavshme me mediat, ai ka thënë se e ka falur kamikazin pa eksploziv të Edi Ramës, Gerti Shehun.

“Por debatet e shumta, lidhur me ngjarjen, më detyrojnë të jem sot këtu para jush për këtë çështje.

Për të sqaruar opinionin se pse unë akuzoj direkt Edi Ramën si autor ose porositës të këtij skenari.

Nuk e akuzoj Edi Ramën për motive dhe shkaqe politike. Jo. Deklaroj me përgjegjësi të plotë se çdo njeri që gabon, që akuzat e mia kanë këtë qëllim, mashtron veten dhe asgjë më shumë.

Nuk e akuzoj aspak për faktin se policia nuk mbrojti protestën.

Unë e akuzoj Edi Ramën sepse Gerti Shehu është informator i policisë kriminale me emër, mbiemër dhe kod, dhe është përdorur nga Ardi Veliu.

Ky informator është përdorur në dokumentet zyrtare për çmontimin e rrjeteve të drogës dhe si vesh për xhematin e xhamisë”, është shprehur Berisha.

Sipas tij përhapja me shpejtësi e variantit të sëmurë psikik, dëshmon se Gerti Shehu është nën mbrojtjen totale të Edi Ramës, që ka porositur krimin e tij.

“Unë e akuzoj Edi Ramën sepse për pacientin e Edi Ramës dhe klientin e Ardi Veliut, nuk ekziston asnjë dokument zyrtar që të faktojë se është i sëmurë i papërgjegjshëm.

Përkundrazi ekziston vendim gjykate që e shpall ligjërisht plotësisht të përgjegjshëm dhe e dënon për goditjen e një personi tjetër.

Çfarë e shtyn Edi Ramën të shpallë Gerti Shehun nga kriminel, në të sëmurë psikik, kjo merret me mend.

I sëmuri i Edi Ramës dhe klienti dhe gjitoni i Ardi Veliut është aq i sëmurë, sa ka rinovuar patentën, që nuk u lëshohet kurrë atyre me probleme mendore.

I sëmuri i Edi Ramës, klienti dhe gjitoni i Ardi Veliut, është aq i sëmurë, sa ka marrë kredi në banka, akt që nuk ndodh kurrë për një të sëmurë psikik”, ka thënë më tej Berisha.

Kreu i PD-së ka shkuar edhe më tej, ndërsa ka thënë se Rama ishte i bindur se me këtë skenar apo ngjarjet që pasonin, do t'i jepnin opozitës një goditje asgjësuese.

“Pse Edi Rama, atë ditë të Samitit, zgjodhi sulmin fizik ndaj Berishës, në kuadër të asgjësimit të opozitës së vërtetë?

Edi Rama ishte i bindur se me këtë skenar apo ngjarjet që pasonin, do t'i jepnin opozitës një goditje asgjësuese.

Ai mendoi se Sali Berisha nuk do ngjitej më në tribunë apo ai do udhëhiqte në zonën ku kërcënohej siguria e Samitit, dhe kështu do u tregonte fytyrën e vërtetë, pjesëmarrësve në Samit.

Ose do të ndodhte që kamikazi i tij të vritej dhe në këtë mënyrë të damkoste opozitën si vrasëse para botës”, ka thënë Berisha./CNA.al