Berisha dënon deklaratat e ministres serbe: Të shpallet “non grata”, të paditet për nxitje të gjenocidit

17 Korrik 2026, 21:46, Politikë CNA

Berisha dënon deklaratat e ministres serbe: Të shpallet “non

Kryetari i Partisë Demokratike, Sali Berisha, ka reaguar pas deklaratave të ministres në qeverinë serbe, Snezhana Paunoviç, duke i cilësuar ato si raciste, antishqiptare dhe të papranueshme.

Sipas Berishës, deklarata e ministres serbe, e cila tha se po të ishte në vend të Sllobodan Millosheviç në vitin 1998 do ta kishte “spastruar etnikisht Kosovën”, ka shkaktuar reagime të forta ndërkombëtare.

Ai thekson se ndaj kësaj deklarate kanë reaguar Zëdhënësia e Komisionit Evropian, Komisionerja për Zgjerim, Marta Kos, Ministria e Jashtme e Mbretërisë së Bashkuar, eurodeputetë dhe personalitete të shumta në Serbi.

Berisha kritikon mungesën e një reagimi nga qeveria shqiptare, duke e cilësuar heshtjen e saj si të pajustifikuar.

Kreu i PD-së i referohet edhe kërkimfaljes së mëvonshme të ministres serbe, e cila sqaroi se kishte dashur të përdorte termin “deportim” dhe jo “spastrim etnik”. Sipas Berishës, ky sqarim nuk ndryshon thelbin e deklaratës dhe dëshmon një qasje të papranueshme ndaj shqiptarëve të Kosovës.

Në përfundim, Partia Demokratike dënon deklaratat e ministres serbe dhe kërkon që ajo të shpallet “non grata” në Shqipëri, si edhe të ngrihet padi ndaj saj për nxitje të gjenocidit.

“Ndjesa e një monstre!

Miq, deklarata e Snezhana Paunoviq, ministre në qeverinë e Aleksandar Vuçiqit, se “po të ishte në vend të Sllobodan Millosheviqit më 1998, do ta spastronte etnikisht Kosovën”, shkaktoi reagime të shumta. Ndaj kësaj deklarate, me të cilën kjo monstër dëshmonte se për të gjenocidi është mënyra e zgjidhjes së problemeve ndëretnike, reaguan ashpër Zëdhënësia e Komisionit Evropian, Komisionerja për Zgjerim, Znj. Kos, Ministria e Jashtme e Britanisë së Madhe, deputetë evropianë, si dhe dhjetëra deputetë e personalitete në Serbi por, natyrisht, jo qeveria e Tiranës.

Ndaj të gjitha këtyre reagimeve, monstra e gjenocidit “kërkoi ndjesë” dhe e “korrigjoi” me cinizëm ekstrem deklaratën e saj, duke thënë se ajo duhej të kishte thënë “deportim” dhe jo “spastrim etnik”, duke dëshmuar kështu se thelbi i moralit të saj është racizmi ndaj etnisë tjetër dhe gjenocidi.

Me këtë rast, Partia Demokratike dënon edhe një herë me forcën më të madhe deklaratat raciste, antishqiptare dhe çnjerëzore të ministres serbe, heshtjen si fija e barit të narkoqeverisë së Tiranës, si dhe përsërit kërkesën për shpalljen e saj “non grata” dhe ngritjen e padisë për nxitje të gjenocidit ndaj saj”, shkruan Berisha./ CNA