web counter
LEXO PA REKLAMA!

SHKARKO APP

App Store
Google Play

E fundit!

x

"Dyfisho sipërmarrjen"/ Rama: Bizneset e mëdha pa akses në program, të voglat dhe të mesmet do të rriten

17 Korrik 2026, 13:08, Politikë CNA

"Dyfisho sipërmarrjen"/ Rama: Bizneset e mëdha pa akses

Kryeministri Edi Rama është i pranishëm në aktivitetin e programit “Dyfisho sipërmarrjen tënde”.

Gjatë fjalës së tij, Rama u shpreh se me këtë program qeveria synon të ndihmojë në rritjen e sipërmarrjeve të vogla dhe të mesme.

Ndër të tjera, shtoi se do të nxjerrë nga zona e komfortit bankat e nivelit të dytë, që, sipas tij, nuk luftojnë për fitimet e tyre.

Rama njoftoi se, përmes zyrës së UNDP në Tiranë, do të angazhohen ekspertë ndërkombëtarë që do të asistojnë bizneset në planet e tyre.

Gjithashtu, theksoi se sipërmarrjet e mëdha nuk do të kenë akses në këtë program.

“Synojmë t’u japim krah ndërmarrjeve të vogla dhe të mesme që të dyfishohen. Ato që janë të mesme të rriten dhe të bëhen të mëdha, dhe ato që janë të vogla të rriten dhe të bëhen të mesme. Duke qenë se bankat kanë një manual të tërë justifikimesh që e përdorin me eficiencë të lartë, një nga këto është që planet e bizneseve nuk janë mjaftueshëm të angazhuara.

Kemi angazhuar edhe zyrën e UNDP, përmes së cilës do të angazhojmë ekspertë ndërkombëtarë dhe do të kemi një grup të gatshëm për të asistuar bizneset që idetë e tyre t’i kthejnë në projekt bindës për bankat.

Ministria e Ekonomisë do të ketë rolin e vet për të garantuar koordinimin mes biznesit dhe grupit të ekspertëve. Kemi vënë në dispozicion një faqe online, në të cilën ka një mundësi për t’iu adresuar drejtpërdrejt ministrisë. Është planifikuar edhe një cikël takimesh në territor për të takuar bizneset, por edhe për të nxitur biznese të caktuara për t’u përfshirë në këtë program.

Kur vjen puna te zhvillimi rural, qeveria ka prioritet agropërpunimin, sepse kemi shumë hapësirë të papërpunuar. Një element i ri i programit është mbështetja e shoqërive të përbashkëta. Sipërmarrjet e mëdha nuk do të kenë akses në këtë program, pavarësisht trukeve që mund të provojnë”, tha Rama.

Ndër të tjera, është shprehur se qeveria është gati ta çojë fondin për këtë program deri në 1 miliard euro.

“Do të ngremë një task-forcë, me përfaqësues të qeverisë, UNDP dhe Shoqatës së Bankave, për të analizuar rezultatet dhe për të parë ku duhet ndërhyrje dhe ku programi ngec. Shifrat janë të gjitha shumë pozitive, por në këtë kohë ka një problem të madh. Shifrat, sa më pozitive të jenë, aq më shumë i acarojnë njerëzit. Sa më shumë të thuash se ekonomia është rritur, aq më shumë prodhohet tension. Sa herë të thuash bizneset janë shtuar, do të përballesh me efektin e kundërt të një lajmi të mirë.

Suksesi i të tjerëve është arsye për të kërkuar edhe suksesin për vete. Çdo lloj dallimi me të tjerët është arsye për t’u acaruar. Ky program është i rëndësishëm edhe në aspektin psikologjik për sipërmarrjet. Jemi gati të shkojmë deri në 1 miliard euro për sipërmarrjen e vogël dhe të mesme, që askush të mos thotë se nuk kam mbështetje financiare për planin tim. Por duhet të kenë një plan që ta aprovojë banka. Këto para janë si fondet e Bashkimit Europian. Do të bëjmë fushatë të tërë informimi me ministrat sipas sektorit të tyre të përgjegjësisë”, tha Rama. /CNA





Lajmet e fundit nga