Alibeaj, fushatë kundër Berishës/ Justifikohet për përçarjen e PD-së

20 Prill 2023, 12:54, Politikë CNA

Kryetari i komanduar i PD-së, Enkelejd Alibeaj, duket se fushatën e tij e ka përqendruar tek ish-kryeministri Sali Berisha.

Teksa po zhvillon një takim elektoral në Kavajë, Alibeaj gjatë fjalimit të tij ka sulmuar Berishën duke thënë se për një hall të tijin personal, PD është në gjendjen ku ndodhet sot.

Ai tha se Berisha i ka bërë demokratët bashkëvuajtës të hallit të tij personal.

Një pjesë e madhe qëndruan këtu. Një pjesë tjetër ikën dhe nuk janë këtu. Përse? Vetëm për sjelljen e një personi. Ai që të gjithë ne demokratët e kemi konsideruar lider historik e bëmë president e 2 herë kryeministër, po për një hall te vetin personal. Jo shkaktuar nga ne, jo shkaktuar nga demokratët. Për një lidhje të drejtpërdrejtë me aleatin historik, të shqiptarëve po e po, por mbi të gjitha Partisë Demokratike, Shteteve të Bashkuara të Amerikës.

“Prej një viti e gjysmë pa shkak, jo për fajin tonë, jo për një interes publik Partia Demokratike, ju të gjithë jeni ndodhur në një agresion. Në agresion jemi ndodhur, sulm, linçim, verbal dhe fizik, financiar dhe juridik. Dhe e gjitha kjo është bërë për një arsye, për një hall personal të një individi. Të një individi, i cili kurrsesi edhe në aspektin njerëzor nuk do të duhej ta kishte kaluar hallin e vet personal te kontribuesit, te Partia Demokratike.

Të cilët vetëm i kanë dhënë. Në fakt, njerëzit e bazës, demokratët, vetëm kanë dhënë e shumë pak kanë marrë. Fus dhe veten këtu në fakt. Të gjithë ata ndër vite që kanë qenë përfaqësues të lartë të Partisë Demokratike kanë marrë nga kontributi, nga djersa, nga sakrifica e demokratëve, njerëzve si ju. Dhe vetëm në aspektin njerëzor, kurrsesi nuk duhej menduar nga askush që nëse ndodhesh në një siklet, në një hall, nuk mund t’i marrësh njerëzit e t’i bësh bashkëvuajtës.

Se praktikisht, ajo që ka bërë Berisha me demokratët është t’i bëjë bashkëvuajtës në hallin personal. Kjo është e papranueshme. Kjo është një çështje e cila ka shkaktuar pikërisht zallamahinë brenda Partisë Demokratike”, tha Alibeaj.

Më tej Alibeaj u justifikua se për të mos përçarë PD-në, vendosën t'u shtrinin dorën me oferta për zgjedhjet lokale.

“Dhe sigurisht nuk përfundon këtu. Nuk përfundon këtu sepse për një vit e gjysmë shumë ngjarje kanë ndodhur brenda nesh.

Nuk morëm asnjë vlerësim që mund ta bënim për veten tonë, në momentin kur kërkuam që në zgjedhjet lokale këto që po vijnë tashmë, të mund ta ruanim të papërçarë Partinë Demokratike. Gjithmonë kemi qenë me ofertë, me shtrirje dore, jo ndaj Sali Berishës, që të jemi të qartë.

Të gjitha ofertat që kemi bërë ne që në prill nëse e mbani mend, ka qenë që të mos krijoheshin struktura paralele të drejtuara prej tij. Ndaj gjithë pjesës tjetër, demokratëtve që dy vite më parë kemi qenë bashkë. Që në zgjedhjet e 2021 apo më parë. Edhe kërkesa për të dalë me një kandidat, nën logon e Partisë Demokratike nuk i drejtohej atij, i drejtohej pjesës tjetër, vëllezërve dhe motrave tona, këtu në Kavajë”, vijoi më tej ai./ CNA.al