web counter
LEXO PA REKLAMA!

SHKARKO APP

App Store
Google Play

12 nëntori, protestë kombëtare/ Leskaj: Më në fund! Do fitojmë kundër sektit Rama

26 Tetor 2022, 21:57, Politikë CNA
12 nëntori, protestë kombëtare/ Leskaj: Më në fund! Do
Deputeti Bujar Leskaj

Deputeti Bujar Leskaj ka reaguar pasi kryetari i Partisë Demokratike, Sali Berisha njoftoi sot mbajtjen e një proteste kombëtare më 12 nëntor, kundër qeverisë së Edi Ramës.

Me anë të një statusi në rrjetet sociale, Leskaj thotë se megjithëse me vonesë, më në fund PD caktoi datën e nisjeve të protestave.

Ai i cilëson protestat dhe mosbindjen civile si mjete demokratike për të refuzuar çdo formë të qeverisjes dhe vendimmarrjeve diktatoriale, si dhe tregues të shëndetit të shoqërisë.

Sipas tij, populli do të fitojë kundër një qeverie që të mohon, shan, fyen e injoron, kundër një sekti kriminal dhe një kryeministri arrogant e cinik.

Statusi i plotë i Bujar Leskajt:

12 nëntor, protestë kombëtare ndaj sektit Rama

Më në fund, megjithëse me vonesë, Partia Demokratike përcaktoi datën 12 Nëntor për fillimin e protestave, së bashku me Partinë e Lirisë dhe të gjitha forcat e tjera opozitare shqiptare.

Protesta, të cilat duhet dhe do të jenë të vazhdueshme deri në rrëzimin e këtij sekti arrogant!

Cilido demokrat, cilido shqiptar ka nga një arsye për të protestuar dhe të gjitha arsyet së bashku, përbëjnë etjen e një populli që nuk pajtohet me keqqeverisjen, mashtrimin, mungesën e transparencës dhe të llogaridhënies nga sekti Rama në pushtet.

Secili prej nesh do të protestojë kundër varfërisë së ulur këmbëkryq, rritjes galopante të çmimeve, arsimit të shkatërruar, shëndetësisë në gjendje mjerane; shpopullimit, largimeve masive të shqiptarëve, sidomos rinisë; do të protestojë kundër sektit, që në nëntë vjet largoi 27% të shqiptarëve dhe mburret për këtë; do të protestojë kundër korrupsionit në çdo qelizë të pushtetit, kundër krimit e drogës në apoteozë, kundër shpërdorimit e vjedhjes së pasurive publike...

Do të protestojmë kundër armiqve të votës së lirë, kundër plaçkitësve të paskrupullt përmes shtetit elektoral, patronazhistëve të kuq dhe bandave kriminale e parave të drogës.

Sepse protestat janë i vetmi mjet që të kujtohemi se jetojmë në demokraci, vetëm protestat na kanë ngelur për t'u përballur me këtë sekt armiqësor ndaj shqiptarëve, që keqqeveris, pa përgjegjshmëri, transparencë e llogaridhënie.

Mosbindja civile dhe protestat janë mjete demokratike për të refuzuar çdo formë të qeverisjes dhe vendimmarrjeve diktatoriale dhe tregues i shëndetit të shoqërisë dhe, si të tilla, një ndër gjërat më të mira që mund t'i ndodhin një shoqërie demokratike.

Shqiptarët nuk janë të varfër, janë të vjedhur dhe kanë një kryeministër harbut që ka mbi dy dekada në majë të pushtetit dhe intimidon shqiptarët.

Shqiptarët nuk janë pa dinjitet; do ta dëshmojnë me protestat, reagimin e tyre dhe përballjen finale me këtë regjim.

Shqiptarët janë të kthjellët, kanë guxim, mendim, energji; dinë të organizohen e të reagojnë.

Çfarë do t’i ngelet sektit armiqësor në qeveri përballë një reagimi të tillë qytetar?

Do të vazhdonte të ishte kaq arrogant, hajdut e armiqësor me popullin?

Jo!

Përballë reagimit masiv të shqiptarëve, sektit Rama do t’i ngeleshin veçse disfata, frika, zmbrapsja, arratisja.

Kundër një qeverie që të mohon, shan, fyen e injoron, duhet të protestosh!

Kundër një rrugaçi të veshur me pushtet që të vret, duhet të veprosh!

Kundër një qeverie që të mohon, shan, fyen e injoron, duhet të protestosh!

Kundër një sekti kriminal, duhet të luftosh!

Një kryeministër arrogant e cinik e rrëzon!

Sado i ashpër të jetë një regjim, populli reagon!

Sado arrogant të jetë një regjim, populli fiton!

Sado të kërcasë dhëmbët sekti Rama, populli e përmbys!

Demokratët dinë të fitojnë ndaj së keqes dhe nuk do ta lejojnë fyerjen, nëpërkëmbjen.

Arrogancës së regjimit antishqiptar i përgjigjemi me protesta demokratike!/ B.A. - CNA.al





Lajmet e fundit nga