E fundit!

09:08 Aktualitet

Krimi që ka ndodhur me protestën

Qytetarët kanë të drejtë të protestojnë, rinia, familja. K...

Qeveria ka rënë, por kë po zë poshtë?!

5 Dhjetor 2025, 12:27, Opinione Basir Çollaku

Më të votuarit e pavotuar... Kjo është një ide e dëmshme me nuanca ndarëse.

Një përpjekje mediatike për të thënë e trukuar mendimin, se këta janë përfaqësues të shumicës së demokratëve.

Ky është nxitim pa fitim. Mos e bëni votën tërheqje litari brenda PD-së.

Votat e një kandidati të një partie ndahen mes kandidatit e subjektit. Sipas rastit shtojnë e pakësojnë njëri-tjetrin. Por secili në fund të procesit rezulton deputet, apo mbetet ish-kandidat në të dyja rastet e PD-së, pavarësisht numrit të votave.

Po nëse më të votuarit apo të pavotuarit nuk do të ishin nën siglën e PD-së?!

A do të ishin më të votuarit?

Shembuj ka mjaft për të thënë se jo. Thjesht do të ishin diku me një dorë vota miqësore, të pamjaftueshme, por të nevojshme.

Problemi emergjencë kombëtare është:

Qeveria ka rënë, opozita e shoqëria, mbarë kombi të shohë.

Ky i rrëzuar kë ka zënë poshtë, cilët janë të rrezikuar nga kjo shembje?!

1-PD dhe opozita

Nuk është shaka. Pa zhurmë e informalisht e thonë shumë. Publikisht nga pak në hiç. Sepse pikërisht kjo është përballja nga pritet ndryshimi. Ndarja mes palëve duhet të jetë radikale dhe e dukshme, jo e hamendësuar. Heshtja e cilitdo kompromenton moralin. Arma e vetme që vret këtë lloj autokracie, formuar me miell kriminal.

2-Mediet

Sepse në shumicën e tyre borderoja është në xhepat e qeverisë. Ata gatuajnë një realitet të pavërtetë për opinionin publik, për atë çfarë është e çfarë bën e masakron pushteti dhe keqbërësit e tij. Ata në masën më të madhe janë kthyer në zgjatime qeveritare, duke u bërë aksionerë në vjedhje, e konsumatorë të një rehatie korruptive e më tej.

3-Shoqërinë civile

Kjo është asgjësuar me ardhjen në qeveri të Ramës. Realisht në shumicën e majtë ajo shfaqet me pikatore sipas fasonerisë. Kryesisht kur i duhet KM të qortojë opozitën. Është mbuluar nëpër projekte dhe gjendet e fikur. Ndonëse duhet të bëjë tërësisht të kundërtën siç ndodh atje ku demokracia merr frymë ende.

4-Intelektualët

Ka shumë prej tyre larg partive. Të paangazhuar. Kjo edhe për faktin se dallimet në edukim e formim i shkaktojnë migrenë palës jopolitike. E megjithatë ata janë aksionerë shumë të rëndësishëm të opinionit publik. Brenda dhe jashtë Shqipërisë. Dhe si të tillë angazhimi përballë rrënimit të vendit nuk bëhet nëpër streha indiference. Një dorë patriotizëm të painfektuar me maskarallëk, ata e kanë më tepër se të tjerët dhe duhet ta përdorin. Sidomos në këtë kohë të pengmarrjes kombëtare nga e keqja.

5-Ndërkombëtarët

Ata janë thjesht të punësuar. Përfaqësojnë interesat e vendeve të tyre. Por në Shqipëri, në këto 12 vite Rama dhe çeta e tij ua ka gjetur pinin e një agjende të dyfishtë. Me zarfe, sajdisje eros-emocionale, kontrata majmërie, mjaft prej tyre u kthyen në zëdhënës të qeverisë edhe kur ajo u bë narkoqeveri. Por ata ndërrohen e ndryshojnë sipas motit.

PD dhe shoqëria opozitare kanë shanse maksimale të bëjnë gati një ofertë morale, profesionale, me integritet, shqiptardashëse, për të hequr të rrëzuarin e ngritur vendin./ CNA