E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

Popullorçe: Fut dorën të kapësh domaten e nxjerr sallatorin!

26 Tetor 2025, 21:17, Opinione Ardi Stefa

Popullorçe: Fut dorën të kapësh domaten e nxjerr
Lexon CV-të dhe arsimimin dhe formimin intelektual të kandidatëve “të pavarur” që garojnë me mbështetjen e PD-së dhe nuk di nëse duhet të qeshësh apo të qash.

Janë njerëz pa lidhje me politikën, pa lidhje me qytetin, pa lidhje me dinjitetin. Disa s’i njeh askush, disa të tjerë njihen për arsyet e gabuara, disa të tjerë njihen vetëm për shkak të ambicies personale, jo për kontributin e tyre qytetar. Dhe pastaj dëgjon PD-në të thotë me krenari: “Ne mbështesim kandidatura qytetare!”

Në fakt, ky është momenti kur kupton pse opozita as përbën alternativë, as frymëzon e as fiton dot. Sepse përzgjedhja e kandidatëve është kthyer në një proces poshtërues për vetë demokratët dhe qytetarët. Kur ti thua se do ndryshimin, por dërgon në garë njerëz që nuk kanë asnjë lidhje me partinë, madje kanë qenë historikisht kundër saj, që s’kanë ndryshuar as veten, e jo më sistemin, në fakt i fyen qytetarët dhe i poshtëron idealet e tua. Kupton që përzgjedhja e këtyre individëve është një sinjal i qartë: nuk ka dëshirë për ndryshim, nuk ka respekt për qytetin, nuk ka asnjë sens të përgjegjësisë publike. Thjesht duhet ruajtur me çdo kusht status quo-ja dhe stanjacioni!

Gjithë kjo histori më ngjan me atë rastin kur fut dorën në qesen me domate dhe në vend të domates kap sallatorin!

Sallatorët nuk janë të këqinj, madje janë të shijshëm, por sallatorët që ka kapur kësaj radhe PD nuk bëhen dot as sallatë e as tarator.

PD në vend që të prezantojë kandidatë me integritet, vizion dhe lidhje me qytetarët, ajo prodhon një sallatë, ku çdo emër është një kompromis, një favor apo një përpjekje për të mbuluar boshllëqet e vetë strukturave partiake me shpresën se mos ndonjëri i shpëton syrit të publikut.

Rezultati dihet: një opozitë një opozitë e humbur në logjikën e saj, e paaftë të krijojë besim dhe respekt dhe që nuk di të zgjedhë njerëzit e duhur, nuk mund të paraqesë asnjë alternativë reale dhe jo vetëm që nuk fiton dot, por as nuk bind më askënd se përfaqëson diçka serioze.

Sepse kur fut dorën, kap dhe mbështet frutin, zarzavaten apo perimen e gabuar, as dora nuk ngelet e pastër, as produkti del i mirë.

Vetëm turp dhe zhgënjim politik!