E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Banorët e qytetit të çuditshëm!

24 Tetor 2025, 14:50, Opinione Mentor Kikia

Ai është një qytet vërtet i çuditshëm. Ndërtesat nuk janë vendosur me rregull, nuk kanë lartësi, arkitekturë dhe ngjyrë të ngjashme. Ato duken sikur i kanë hedhur nga avioni, si të hedhësh, ta zëmë, një shuk me letra dhe ato bien ku ti çojë forca e rëndesës(aq sa mund të rëndojë një letër, kuptohet) dhe era. Pranë e pranë gjen një ndërtesë me 35 kate, një me 7 kate dhe një shtëpi me mure balte, për të cilën janë zënë e nuk flasin 15 kushërinj.

Njerëzit janë edhe më të çuditshëm. Ata flasin natë e ditë për vrasje, arrestime, inspektime dhe kurvëri. Ata mbërthehen para ekraneve dhe shikojnë lajme me krime, duke ndaluar frymëmarrjen: Filanin e rrëmbyen dhe e zhdukën. Filanin e vranë. Filanin e ekzekutuan sepse nuk e pa me buzëqeshje… Shumë ekspertë mblidhen e diskutojnë. Asnjëri nuk ka qenë atje. Por të gjithë e dinë çfarë ka ndodhur dhe secili ka nga një version për atë që ka ndodhur. “Ja, edhe një tjetër që qenka rrezuar me biçikletë në kanal. Edhe ai derdimeni që ka rënë me gjithë karrocë në përrua. Të paktën kali kishte shpëtuar”- epo çfarë bëhet në këtë vend more.

Lajmet me vdekje janë edhe më interesante. Nëse një njeri është në spital, në gjendje të rëndë, ç’të keqe ka nëse themi se vdiq? Ai për të vdekur që për të vdekur ka. “Po pse nuk vdes mora man, ka tri ditë që themi vdiq, vdiq, e ai ende në koma! Si mund të shkojë ditë pa një vdekje VIP?”

Po arrestimet? Arrestimet janë bixhoz. Çfarë lotarie thuaj.

Lajmëtarët e arrestimeve, çdo natë lajmërojnë:

-Do të ketë arrestime!

-Kur mo, kur, se na plasët?

-Ja së shpejti, në tetor. Po, në mos në tetor, në dhjetor e sigurt.

-Po kush? Sa?

-A, nuk e them dot. Do të jenë të mëdhenj, peshkaqenë shumë të mëdhenj.

Gjashtë muaj përpara shpërndahet lajmi se urdhër-arresti është gati. Por korrieri që duhet ta dërgojë në polici nuk ka ardhur, i ka vdekur vjehrra. Atëherë ta bëjmë publike, që i kërkuari të vijë vetë. Mediat shkruajnë, njerëzit diskutojnë: -Mirë ia bënë qenit.- Jo mo jo, se ka edhe më hajdutë se ky, ia kanë me hile. Pastaj çështja harrohet. Korrieri mbaron zinë e vjehrrës dhe vjen në punë. Por i kërkuari ka ikur. Mos! Kush e lajmëroi?

Jemi në krizë. Shumë gazetarë janë pushuar nga puna, për të reduktuar shpenzimet. Ministrat dhe zyrtarët e tjerë i bëjnë vetë lajmet. Fantastike! Njerëzit kënaqen kur i shikojnë me kapele dhe jelekë të verdhë, ndërsa shkojnë në kantiere ndërtimi. Sa e bukur është fjala “inspektim”. Sipas fjalorit do të thotë: “Shoh punën e dikujt, jap udhëzime”. Në këtë qytet të gjithë shohim punët e njëri-tjetrit dhe të gjithë japim mend, d.m.th. jemi të gjithë inspektorë. Po kur inspektojnë ministrat serat e perimeve dhe bëjnë foto me domate e kastraveca, e keni parë sa bukur duken?

-Çfarë the ti mo, s’ka ilaçe tek Onkologjiku?

-Ehuha…

-Po influencerja e famshme Marinela që është ndarë nga i dashuri dhe brenda javës gjeti një tjetër? Për lajme me k*rva ne vdesim.

E megjithatë vëmendjen më të madhe e mori letra e një burri, që iu drejtua faqes “Popull mbaj mendjen” për ndihmë: Kam kapur gruan për herë të dytë me dashnorin. Çfarë më sugjeroni, ta ndaj apo t’ia fal edhe kësaj radhe?

Brenda një ore 1300 komente, 100,000 lexime.

Jep edhe ti mendimin tënd! Ç'të bëjë ai?

Mbi qytet ka rënë mjegull. Shumë romantike. Dikush tha se është pluhur ndotës. Do të jetë ngatërruar./ CNA