E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

Përse opozita e çoi dëm shansin e Tiranës?

23 Tetor 2025, 14:07, Opinione Mentor Kikia

PD nuk nxori (dot) një kandidat për Bashkinë e Tiranës, sepse ata që perceptoheshin si më të mundshmit pretendentë, refuzuan. Refuzuan sepse nuk kishin siguri në fitore dhe kuptuan se do të ishin thjesht viktima e radhës.

Edhe sepse partitë e vogla opozitare nuk donin të mbështesnin një vartës të Berishës. Dhe u shkua tek eksperimenti me Florian Binajn, i cili ka mbështetjen e opozitës, por përpiqet të mos prezantohet si përfaqësues i asnjë partie, me shpresën se do të marrë përfitimin, por jo kostot.

Gjithsesi, çfarë mund të kishte bërë më mirë opozita në Tiranë? Po i referohem specifikisht PD-së.
Tirana mund të kishte qenë fusha ku do të stërvitej jo vetëm skudra pretendente për bashkinë, por skuadra e re demokrate. Mund të ishte pista ku të bënte nxemjen jo thjeshtë kandidati për Bashkinë e Tiranës, por edhe kandidati për lidershipin e ri politik.

Pas 11 majit, opozita është jo vetëm e mpakur, por edhe e demoralizuar. Njerëzit e saj që pranojnë poste qeveritare janë dëshmi e dorëzimit. Berisha kërkon heronj qëndrestarë, por 16 vjet në opozitë janë shumë për këdo, në një vend, ku edhe roja i spitalit rekomandohet për punë nga partia. PD duhej që, krahas denoncimit të zgjedhjeve të 11 majit dhe denoncimit të korrupsionit qeveritar, të futej(futet) në procesin e ristrukturimit, për t’u bërë alternativë qeverisë dhe frymëzuese në zgjedhjet e ardhshme. Dhe Tirana ishte shansi për t'u hapur skenën të rinjve, të tregonin aftësinë, ambicien, artikulimin në komunikimin publik, idetë dhe qasjet e tyre, të prezantoheshin me qytetarin tiranas dhe shqiptarët në tërësi. Sepse kështu do të prodhohej lidershipi i ri, jo duke dalë nga çanta e kryetarit të vjetër.

Por kjo nuk ndodhi, sepse askush nuk guxoi dhe mbi të gjitha sepse, Berisha e kishte vendosur: Ai do të vazhdojë të jetë kryetari. Dhe, kur Berisha është në lojë, asnkush nuk mendon të dalë në nxemje.

Berisha do të kandidojë sërish për kryetar partie. Dhe do ta fitojë, pasi askush nuk do të garojë me të. Ai do të jetë 82 vjeç kur të rikonfirmohet në krye të PD-së dhe 85 vjeç kur të vijnë zgjedhjet. PD do të ketë pësuar më shumë erozion dhe pranë ai do të ketë më së shumti bashkëkohës e bashkëmoshatarë që morën mandate me listën e mbyllur, pasi nuk duan të qëndrojnë në shtëpi me nipërit dhe mbesat. Zgjedhjet e 11 majit, me gjithë entuziazmin e partive të reja, treguan se “licencën” e opozitës e ka PD-ja dhe PD-në e ka Berisha.

Berisha dhe të tijtë kërkojnë dhe mendojnë se do të duhet të jetë burgu zgjidhje për rrotacionin politik. Në burg ka plot ish-ministra, ish-deputetë, ish-kryetyarë bashkie, ish-drejtorë etj., por kjo nuk mjaftoi që populli të revoltohet me votë. Sepse nuk mjafton që qeveria është e korruptuar që opozita të vijë në pushtet. Sepse, mesa duket, të ndalojë “Rama 4”, për të risjellë “Berisha 4”, nuk u pa si zgjidhje.

Socialistët, ndërkohë, kanë fituar imunitet ndaj skandaleve dhe arrestimeve. Publiku, me ndihmën e propagandës, po ashtu. Qeveria ka vetëm një qëllim tani: Shqipëria të fitojnë një status “anëtari në BE”, si do të jetë, pa të drejtë vote e pa të drejtë vetoje. Të quhet “anëtar në pritje” a si të duan ata, mjafton të arrijë politikisht premtimin “Shqipëria 2030”.