E fundit!

12:08 Aktualitet

Edhe një tjetër “pikëz e voçkël” mbushet me shtëpi

Analisti dhe gazetari Mentor Kikia ka reaguar pas zjarrit ...

Nga Grigels Muçollari/ Zëvendëslali dhe SPAK

22 Korrik 2024, 20:35, Opinione CNA

Grigels Muçollari

Zëvendësi i Erjon Veliajt ishte në SPAK, qendroi 3 orë atje, dhe e vetmja gjë që u mor vesh ishte gjysëm fjalia që doli nga goja e tij, se dha disa shpjegime.

Asnjë deklarim, asnjë njoftim nga Prokuroria, edhe pse inceneratori i Tiramës apo dosja 5D, janë çështje me interes të lartë publik, si dy prej aferave më të mprehta korruptive, si dy raste të zhvatjes brutale të taksave të qytetarëve të Tiranës.

Ka një tendencë gjithnjë e më të dukshme që kur është fjala për çështje që prekin opozitën, ose imazhin e saj, SPAK bën komunikim për mediat. Kur është fjala për raste, apo dosje që cënojnë imazhin e integritetin e drejtuesve kryesorë të rilindjes, SPAK është hermetik.

Madje, më flagrant ishte rasti kur prokuroria speciale doli e përgenjështroi një lajm që rendonte mbi Veliajn.

Do të mjaftonte kaq, për të kuptuar se ajo që lindi si shpresë për drejtësi, për të mbyllur kapitullin e pandëshkueshmërisë, për të luftuar korrupsionin e niveleve të larta, është në të vertetë një iluzion.

SPAK edhe në detajet që lidhen me propagandën e PR-in e qeverisë, është tërësisht në harmoni me to.

Kjo njëanshmëri po krijon një padrejtësi të re të madhe, po mban pa autor dy prej skandaleve më të mëdha korruptive në këto 30 vite, po krijon idhuj e politikanë të paprekshëm.

Kjo për fat të keq është e kundërta e luftës ndaj korrupsionit, është amnistim, legjitimim i hajdutërisë.

Veliaj, dhe zëvendësi i tij aktualisht Ministër, i kanë të dy duart në skemat e inceneratorit dhe 5D. Zëvendëslali ka bërë edhe marifete të atilla, sa të çojë lekët e Bashkisë ku ishte nën-kryetar tek testoranti i tij, pronë e tij. Në këto kushte, të dy ata do të duhej të dilnin nga dera e pasme e SPAK si të pandehur, të shoqëruar me polici, dhe jo nga dera e përparme, si të ishin heronj, ku njëri i shpall prokuroret kolegë, e tjetri duket i bezdisur që i kanë marrë 3 orë nga koha e tij e çmuar në shërbim të vatanit.

Derisa nuk bëjnë asnjë njoftim publik, na ngelet të rrisim dyshimin se këto dekika që dy përgjegjësit e vjedhjeve në Tiranë kalojnë në SPAK, janë për të sheshuar ndonjë keqkuptim të vogël, ose për të bërë ndonjë pakt të ri.

E vërteta do dalë një ditë.

Nën akuzë, ata janë në sytë e të gjithëve. Çdo provë e rrethanë është kundër tyre. Deri tani, vetëm SPAK nuk dallon dot këtë aktivitet të thekur intelektual të lalit dhe zëvendëslalit./ CNA